Programmas pro elaboradore

Mi paret de bos intèndere domandende "eMule? Ancora esistit?". Difatis, eMule fiat famadu meda in is primos 10 annos de su 2000 comente servìtziu pro iscarrigare mùsica, pellìculas e programmas, ma a pustis medas sunt colados a Torrent e prus tardu a is prataformas de streaming. Su progetu de eMule no est mai mortu, mancari no apat retzidu annoamentos pro 10 annos e si preparat immoi a nde essire cun sa versione 0.60a. Sa beta est giai a disponimentu e batit càmbios de interessu.

Est istadu pro meda su navigadore de impreu prus mannu in su mundu, dd'amus odiadu meda comente impitadores e comente isvilupadores web. Dd'amus mudadu cun Firefox e Chrome regordende·ddu comente esempru de navigadore coanu, pagu seguru e pagu respetosu de is istandard. Fiat craru dae ora chi Internet Explorer fiat morende e immoe est ufitziale: sa versione 11, publicada in su 2013 at a èssere s'ùrtima. S'amparu acabbat su 17 austu de su 2021.

Su progetu FreeDOS at organizadu pro su 29 de làmpadas a is 16 de s'oràriu nostru, un'addòbiu pro festare is 26 annos de atividade.

Microsoft at annoadu su sistema operativu suo in Maju cun sa publicatzione de Windows 10 May 2020. No est unu càmbiu cumpridu de sistema, ma unu megioramentu mannu de is funtziones de su sistema chi esistiant giai. A dolu mannu, is impreadores chi ant installadu custa versione noa ant tentu medas problemas.

A pustis de s'ùrtimu annoamentu, Telegram ammustrat unu messàgiu chi cumbidat s'impreadore a cambiare versione de su sistema operativu cun una a 64 bit o no at a pòdere annoare Telegram incumentzende dae su 1 de cabudanni.

A un'annu e mesu dae sa publicatzione de sa primu beta, un'àteru passu cara a sa prima versione istàbile de Haiku, sistema clone de BeOS chi bos apo giai presentadu pagu tempus a oe. Sa noa de s'essida de sa beta 2 est de erisero e deo dd'apo proada in is primas oras de notesta. De sighida sa relata.

Pro sa felitzidade de is amantiosos de is elaboradores de is annos 80-90, est acanta a essire una versione noa, 1.3, de FreeDOS, unu sistema operativu chi clonat MS-DOS, su sistema Microsoft abbandonadu a pustis de sa publicatzione de Windows 95 e benidores.

Is chi ant incumentzadu a imparare sa programmatzione in is annos 80 ant de seguru impreadu a su mancu una borta GW-Basic, unu cumpiladore a lìnia de cumandu distribuidu cun MS-DOS. Microsoft at detzìdidu de publicare su còdighe de orìgine pro impreu didàticu, comente annuntziadu in su diàriu de programmatzione suo. 

Su progetu de Haiku at publicadu giai dae calicuna chida unu resùmidu de s'atividade de abrile, chi donant una noa bella: si previdit sa publicatzione de sa versione Beta 2 a sa fine de maju, 1 annu e mesu a pustis de sa prima beta. Intra is megioros chi custa versione at a batire ddoe at un'istabilidade prus manna in su suportu de vàrios tipos de perifèricas e in is prestatziones.

Trinity Desktop Environment (TDE) est un'ambiente de iscrivania pro sistemas Unix/Linux, derivadu dae KDE 3.5 e nàschidu su 29 abrile 2010 cando KDE est lòmpidu a sa versione 4, pro frunire un'ambiente bellu, ricu, cumpridu e istàbile.