Apustis de s'ùrtimu annoamentu, Telegram amostrat unu messàgiu chi cumbidat s'impreadori a cambiai versioni de su sistema operativu cun una a 64 bit o no at a podi annoai Telegram incumentzendi de su 1 de cabudanni.

Est a disponimentu sa versioni noa de Drupal, sistema de manìgiu de su càbidu chi est impreau puru po custu diàriu.
Custa versioni est stètia publicada su 4 de làmpadas impari cun sa versioni 8.9.0, chi dd'asimbillat e chi at essi suportada fintzas a Donniasantu 2021, arricendi is annoamentus de seguridadi, po giai a is impreadoris su tempus de colai a sa 9 chena pressi.

A un'annu e mesu de sa publicatzioni de sa primu beta, un'àteru passu cara a sa prima versioni stàbili de Haiku, sistema cloni de BeOS chi bos'apu giai presentau pagu tempus a oi. Sa noa de sa bessida de sa beta 2 est de ariseu e deu dd'apu proada me is primas oras de notesta. De sighida s'arrelata.

Po sa felicidadi de is amantiosus de is elaboradoris de is annus 80-90, est acanta a bessiri una versioni noa, 1.3, de FreeDOS, unu sistema operativu chi clonat MS-DOS, su sistema Microsoft abandonau a pustis de sa publicatzioni de Windows 95 e benidoris.

Sa BBC at publicau sa noa de s'imbìstigu de sa politzia de Londra apitzus de unu grupu chi est bendendi unu dispositivu, su 5GBioShield, chi  "Po mèdiu de unu protzessu de tzàntzigu cuànticu abalantzat e re-armonizat is frecuèntzias strumbulladoras chi benint de s'impestadura elètrica ingendrada de dispositivus comenti elaboradoris mòbilis, telèfunus chena filus, wi-fi, tauleddas, et cetera".

Google at annunciau un'acuntessimentu po su 3 de làmpadas a is 17:00, innui at a presentai sa beta de sa versioni 11 de su sistema operativu Android.
In s'acuntessimentu, chi ddi nant "Beta Launch Show", s'at a chistionai de is funtzionis noas de su sistema e de is noas dedicadas a is svilupadoris.
At a sighiri una sessioni de pregontas e arrespustas innui totus ant a podi scriri is pregontas cun s'impreu de s'hashtag #AskAndroid.

Is chi ant incumentzau a imparai sa programatzioni me is annus 80 ant de seguru impreau a su mancu una borta GW-Basic, unu compiladori a lìnia de cumandu distribuiu cun MS-DOS. Microsoft at decìdiu de publicai su còdixi de orìgini po impreu didàticu, cumenti annuntziau in su diàriu de programatzioni suu. 

Scriendi un'artìculu po un'àteru diàriu apu inghitzau a mi pregontai si sa genti chi no traballat cun elaboradoris e retzas dònnia dii sciit deaderus de ita seus chistionendi candu impreaus unus cantus fueddus chi tocant s'argumentu de sa trasmissioni digitali de s'informatzioni. Apu duncas decìdiu de fai un'articuleddu didàticu po ddus acrarai.

Su progetu de Haiku at publicau giai de calincuna cida unu resùmini de s'atividadi de abrili, chi donat una noa bella: si previdit sa publicatzioni de sa versioni Beta 2 a sa fini de maju, 1 annu e mesu a pustis de sa prima beta. Intra is mellorus chi custa versioni at a bitiri ddoi at una stabilidadi prus manna in su suportu de vàrius tipus de perifèricas e in is prestatzionis.

Eus festau is annus de TDE calincuna dii a oi e de virus nd'intendeus fueddendi fintzas tropu in custu annu stròlicu 2020. Calincuna dii a oi perou est stètiu su de 20 cumpleannu de un'àtera genia de virus – unu bermi po essi prus precisus – chi fiat famau meda po unu pagu de tempus: ILOVEYOU.
Nd'eus a amentai a manera curtza sa stòria e eus a giai un'ograda de curtzu a su còdixi de custu malware.