Si-dd'arregordais Napster? Fiat famau meda intra su 1999 e su 2001 comenti servìtziu po scarrigai mùsica in formau MP3 e est sparèssiu apustis chi su grupu de is Metallica dd'at fatu càusa e unu giugi dd'at obligau a serrai e a pagai su dannu.

Sa versioni noa de Android est bessida a prus de un'annu de sa de dexi e is dispositivus cumpatìbilis dda funt giai scarrighendi po s'annoai. Ia giai chistionau de unas cantu noas de custu sistema in un'artìculu de su martzu passau. Andaus a biri imoi una pariga de càmbius de importu po s'esperièntzia de impreu.

Oi est sa dii de is programadoris. Sa festa est connota a manera ofitziali in Rùssia sceti, innui, arrespundendi a un'arregorta de firmas, su guvernu at decìdiu de dedicai custa festa a is programadoris po s'importu insoru a su svilupu de sa sociedadi. Sendi chi is programadoris funt una comunidadi internatzionali, no est cosa stròlica a si fai is augùrius, mancai no siat dii de festa ofitziali a foras de sa Rùssia.

Medas de nosu acostumant a imbiai e arriciri messàgius in Facebook ma no funt interessaus a tenni su situ o s'aplicatzioni de Facebook aberta e duncas impreant s'app Messenger, chi perou est a disponimentu sceti po Windows e cellularis. Ddoi fiat unu progetu de Messenger po Linux unus cantu annus a oi, ma no esistit prus. Po sorti, nc'est sa manera de assetiai un'àtera aplicatzioni po funtzionai comenti Messenger.

Mi parit de s'intendi domandendi "eMule? Ancora esistit?". Difatis, eMule fiat famau meda in is primus 10 annus de su 2000 comenti servìtziu po scarrigai mùsica, pellìculas e programas, ma a pustis medas funt colaus a Torrent e prus tradu a is prataformas de streaming. Su progetu de eMule no est mai mortu, mancai no apat arriciu annoamentus po 10 annus, e si preparat imoi a ndi bessiri cun sa versioni 0.60a. Sa beta est giai a disponimentu e bitit càmbius de interessu.

Ocannu si seus acostumaus a ponni mascareddas po s'amparai contras a su Coronavirus. Nd'eus connotu de dònnia genia: chirùrgicas, FPP2, etc, ma s'eletrònica dda depiaus ancora biri.
Nc'at pensau LG, chi at annuntziau sa mascaredda a baterias.

Ariseu, cun una vìdeu-presentada, Fairphone at presentau una versioni noa de su telefoneddu suu. No est unu mollu nou, a nai sa beridadi, ma un'annoamentu de sa de tres versionis cun is pròpiu piessìnnius, foras de is fotocàmeras, chi colant de 12MP a 48MP po de sa de pabas e de 8MP a 16MP po sa de afaci. Su sistema operativu installau est Android 10. Sa versioni 3 fiat bèndia cun Android 9 ma un'annoamentu est pranificau po su 07.09.2020, duncas pagu càmbiat, arraxonendi de is programas.

Est stètiu po meda su navigadori de impreu prus mannu in su mundu, dd'eus odiau meda comenti impitadoris e comenti svilupadoris web. Dd'eus mudau cun Firefox e Chrome arregordendi-ddu comenti esempru de navigadori coaxu, pagu seguru e pagu arrespetosu de is standard. Fiat craru de diora chi Internet Explorer fiat morrendi e imoi est ofitziali: sa versioni 11, publicada in su 2013 at a essi s'ùrtima. S'amparu acabat su 17 austu de su 2021.

Microsoft Duo est un'aparatu chi assimbillat a una tauledda, ma partziu  in duas alas chi si podint serrai che unu lìburu, cadauna cun unu schermu de 5,6". Is duus schermus si podint impreai a manera indipendenti o a manera de formai unu schermu mannu. Su dispositivu portat unu processori Qualcomm Snapdragon 855, 6 GB de RAM, 128 o 256 GB de memòria de massa, fotocàmera de 11 megapixel, connessioni LTE e sistema Windows 10.

Fiat ora! - at a ai pensau calincunu. Telegram iat annuntziau de traballai a is vìdeu-tzerriadas in su 2017 e mancai innantis puru, candu fiat un'aplicatzioni po messàgius de testu sceti. Is tzerriadas funt arribadas in su martzu 2017 e eus abetau àterus 3 annus po su vìdeu, chi imoi est a disponimentu po dispositivus Android e iOS, mancai ancora in versioni alpha.