Cortana, s'assistenti vocali de Microsoft est arribada in su 2014 impari cun Windows Phone 8.1 ma, comenti su sistema Microsoft po telefoneddus, no est arrennèscia a intrai in su coru de is impreadoris e duncas Microsoft at decìdiu de dda bogai de is dispositivus iOS, Android a incumentzai de su 2021. Dd'at annuntziau sa Microsoft etotu in un'artìculu in su giassu suu.

Google at publicau sa versioni 84 de su navigadori suu, Chrome. Sa publicatzioni est arribada tradu, comenti po totu is versionis a incumentzai de sa 81, po mori de su traballu chi est andendi prus a bellu in custu tempus de pandèmia. Is noas, impari cun sa normali curretzioni de faddinas, tocant sa seguresa e s'agiunta de funtzionis noas.

No fiat difìcili de bisai chi Facebook bolessit auniri a unu certu puntu totu is aplicatzionis de messàgius suas in una sceti o a su mancu de fai a manera chi siat prus fàcili a comunicai cun is impreadoris de s'una o de s'àteru e dd'iat fintzas cunfirmau Zuckerberg s'annu passau. Unu programadori at scritu un'artìculu apitzus de s'incomentzu de sa possibilidadi de auniri Messenger cun Instagram, mancai siat ancora sceti una proa tènnica chi podit essi tirada me is mesis chi benint.

S'arregorta de firmas po su domìniu .srd est inghitzada giai de diora meda e sighit cun s'agiudu de is sardus e de is amantiosus de sa Sardìnnia chi nci creint.
Su domìniu de primu livellu, dd'arregordaus, est sa parti apustis de s'ùrtimu puntu in s'indiritzu de unu situ. Bì sa letzioni apitzus de su Web po prus informatzionis.

Funt sceti 4 millionis is scarrigamentus de s'app Immuni, su programa po telefoneddus chi depiat agiudai a firmai sa spraxidura de s'impestu de COVID-19. Est unu nùmeru meda prus bàsciu de su 60% de sa populatzioni chi fiat sa percentuali de segudai po podi funtzionai beni. Su scarrigamentu no est obligatòriu e in nisciunu casu ddu podit essi pro mori de sa costitutzioni italiana e de is leis in contu de privadesa, ma su guvernu italianu sperat de cunvinci prus genti cun una publicidadi prus manna me is diis chi benint.

Adobe nosi informat chi su 31 de Idas 2020 at a acabai de annoai e cumpartiri su Flash Player, programa chi est stètiu po medas annus sa basi de medas giassus Web, incluiu Youtube, ma chi a incumentzai de su 2015 at inghitzau a essi mudau cun solutzionis HTML5, prus lèbias, prus seguras e prus adatas a funtzionai in telefoneddus e àterus dispositivus mòbilis.

Una de is noas de importu prus mannu in sa cunferèntzia de is svilupadoris de Apple de ocannu est sa decisioni de lassai is processoris Intel apustis de 15 annus po impreai is processoris insoru, is Apple Silicon.

Su progetu FreeDOS at organizau po su 29 de làmpadas a is 16 de s'oràriu nostu, un'atòbiu po festai is 26 annus de atividadi.

Un'arrelata de Awake Security at sinnalau chi unas cantu estensionis malas de Google Chrome tenint sa possibilidadi de furai datus de is dispositivus de is usuàrius.

Mozilla est traballendi a un'arretza VPN chi po su momentu est in fasi beta e a disponimentu sceti in pagu regionis de su mundu. Sa promissa de Mozilla est de poni a disponimentu una VPN fàcili de impreai e fata segundu is opinionis de is impreadoris e de is necessidadis insoru.