Facebook est circhendi de auniri Messenger, Instagram e Whatsapp

No fiat difìcili de bisai chi Facebook bolessit auniri a unu certu puntu totu is aplicatzionis de messàgius suas in una sceti o a su mancu de fai a manera chi siat prus fàcili a comunicai cun is impreadoris de s'una o de s'àtera e dd'iat fintzas cunfirmau Zuckerberg s'annu passau. Unu programadori at scritu un'artìculu apitzus de s'incomentzu de sa possibilidadi de auniri Messenger cun Instagram, mancai siat ancora sceti una proa tènnica chi podit essi tirada me is mesis chi benint.

Su traballu no est fàcili poita ca custas aplicatzionis funt nàscias comenti progetus diferentis, donniuna cun is piessìnnius suus e po su momentu est sceti un'idea chi no est stètia cunfirmada cun publicatzioni ofitziali de minudas. Est craru perou chi Facebook est circhendi de s'annoai in sa gràfica e in s'oferta sua cun arresurtaus chi no funt sèmpiri bonus: s'arrespusta sua a Tik Tok, Lasso, est stètia serrada una pariga de diis a oi e a pustis de sa chèscia "Stop Hate for Profit" (Abastat cun sa tìrria po gadàngiu) at dèpiu cambiai càncua arrègula po sa publicatzioni.