Facebook est chirchende de unire Messenger, Instagram e Whatsapp

No fiat difìtzile de bisare chi Facebook boleret aunire a unu tzertu puntu totu is aplicatziones de messàgios suas in una isceti o a su mancu de fàghere a manera chi siat prus fàtzile a comunicare cun is impreadores de s'una o de s'àtera e dd'aiat fintas cunfirmadu Zuckerberg s'annu passadu. Unu programmadore at iscritu un'artìculu a pitzus de s'incumentzu de sa possibilidade de unire Messenger cun Instagram, mancari siat ancora isceti una proa tècnica chi podet èssere tirada in is meses chi benint.

Su traballu no est fàtzile pro ite ca custas aplicatziones sunt nàschidas comente progetos diferentes, onniuna cun is piessìnnios suos e pro su momentu est isceti un'idea chi no est istada cunfirmada cun publicatzione ufitziale de minudas. Est craru però chi Facebook est chirchende de s'annoare in sa gràfica e in s'oferta sua cun resurtados chi no sunt semper bonos: sa risposta sua a Tik Tok, Lasso, est istada serrada una pariga de dies a oe e a pustis de sa chèscia "Stop Hate for Profit" (Bastat cun sa tìrria pro balàngiu) at dèpidu cambiare carchi règula pro sa publicatzione.