Ocannu si seus acostumaus a ponni mascareddas po s'amparai contras a su Coronavirus. Nd'eus connotu de dònnia genia: chirùrgicas, FPP2, etc, ma s'eletrònica dda depiaus ancora biri.
Nc'at pensau LG, chi at annuntziau sa mascaredda a baterias.

Ariseu, cun una vìdeu-presentada, Fairphone at presentau una versioni noa de su telefoneddu suu. No est unu mollu nou, a nai sa beridadi, ma un'annoamentu de sa de tres versionis cun is pròpiu piessìnnius, foras de is fotocàmeras, chi colant de 12MP a 48MP po de sa de pabas e de 8MP a 16MP po sa de afaci. Su sistema operativu installau est Android 10. Sa versioni 3 fiat bèndia cun Android 9 ma un'annoamentu est pranificau po su 07.09.2020, duncas pagu càmbiat, arraxonendi de is programas.

Est stètiu po meda su navigadori de impreu prus mannu in su mundu, dd'eus odiau meda comenti impitadoris e comenti svilupadoris web. Dd'eus mudau cun Firefox e Chrome arregordendi-ddu comenti esempru de navigadori coaxu, pagu seguru e pagu arrespetosu de is standard. Fiat craru de diora chi Internet Explorer fiat morrendi e imoi est ofitziali: sa versioni 11, publicada in su 2013 at a essi s'ùrtima. S'amparu acabat su 17 austu de su 2021.

Microsoft Duo est un'aparatu chi assimbillat a una tauledda, ma partziu  in duas alas chi si podint serrai che unu lìburu, cadauna cun unu schermu de 5,6". Is duus schermus si podint impreai a manera indipendenti o a manera de formai unu schermu mannu. Su dispositivu portat unu processori Qualcomm Snapdragon 855, 6 GB de RAM, 128 o 256 GB de memòria de massa, fotocàmera de 11 megapixel, connessioni LTE e sistema Windows 10.

Fiat ora! - at a ai pensau calincunu. Telegram iat annuntziau de traballai a is vìdeu-tzerriadas in su 2017 e mancai innantis puru, candu fiat un'aplicatzioni po messàgius de testu sceti. Is tzerriadas funt arribadas in su martzu 2017 e eus abetau àterus 3 annus po su vìdeu, chi imoi est a disponimentu po dispositivus Android e iOS, mancai ancora in versioni alpha.

Bos'apu giai chistionau de sa batalla po su domìniu .srd. In custu ùrtimu mesi, cun una presèntzia prus manna me is arretzas socialis, pruschetotu Facebook, Andrea Maccis e is àterus promovidoris funt arrennèscius a fai cumprendi a genti meda su sentidu de custa arrecheta, beni arresuminada in su slogan "Pesaus a solus sa màgini nosta cun su domìniu .srd", arribendi a 5000 firmas in sa petitzioni, metadi de su caminu po 10000 chi est sa punna.

TikTok, fintzas a su mesi de donniasantu passau ligiat su còdixi MAC de is dispositivus de is impitadoris. Ndi chistionat Wired cun rifermentu a un'artìculu de Wall Street Journal. Su MAC est unu còdixi identificativu, diferenti po dònnia aparatu acapiau a s'arretza. Est un'informatzioni chi is agentzias publicitàrias iant a bolli sciri po ita ca permitit de scoberri cali giassus is usuàrius abìsitant e duncas su gustu insoru. S'acessu a su MAC in Android est proibiu de Google, ma fiat possìbili gràtzias a una debilesa de Android.

De pagu tempus a oi, Facebook at decìdiu de gherrai contras a sa difusioni de is noas farsas, siat burrendi is càpius chi no arrespetant is "standard de sa comunidadi" (linguàgu gherristu, ratzismu, spam, etc), siat ponendi is etichetas de averiguu a is noas, cun s'agiudu de agentzias esternas. Custa solutzioni permitit de informai is impitadoris in contu de sa validesa de is noas chi funt ligendi, chena censurai is chi arresurtant farsas apustis de s'averiguu.
Cun s'evolutzioni de sa pandemia de COVID unu scenàriu nou est bessiu a pilu: noas beras chi funt bessias tropu bècias e donant imoi un'informatzioni faddia.

Google Play Mùsica est una de cussas aplicatzionis chi medas de nosu no impreant ma chi no fait a bogai de su telefoneddu, ca funt cunsideradas "aplicatzionis de sistema". Serbit a comporai mùsica, a sa pròpiu manera de iTunes e Amazon Music e permitit fintzas de dd'ascurtai comenti in Spotify. Comenti e chi siat, Google at decìdiu de dda serrai a fini de ocannu. Is funtzioni suas ant a essi postas a disponimentu de YouTube Music, innui is impitadoris podint portai sa mùsica chi ant giai comporau, po no dda perdi.

Cun unu messàgiu curtzu, Toshiba at decrarau in su giassu suu chi at lassau sa cuota sua de Dynabook a sa Sharp. Dynabook est su nòmini nou de Toshiba Client Solutions Co., Ltd a pustis chi Sharp nd'at comporau sa parti manna. In custa manera, Toshiba est bessida a foras de su setori de is elaboradoris personalis.