Sa memòria est unu de is cumponentis de fundamentu de unu calisisiat elaboradori, segundu is definitzionis de Turing e Von Neumann. Fintzas candu no si-nd'acataus, seus impreendi calincunu tipu de memòria, fintzas me is mini-carculadoris de busciaca. Difatis, su carculadori depit regordai a su mancu is datus de intrada po podi fai un'operatzioni e sa cantidadi de datus de regordai crescit cun sa cumplessidadi de is càrculus e fintzas de s'interfàtzia de impreu.
Ddoi at medas tipus de memòria e podint essi classificadas in maneras diferentis segundu s'impreu e is caraterìsticas tènnicas. Innoi bideus is prus de importu.

Eis mai intèndiu chistionai de cumèrciu giustu? Mancai calincunu de bosatrus at comporau alimentus cun s'eticheta "Fair Trade" chi costant pagu prus de is atrus ma benint de unu processu de produtzioni chi respetat is traballadoris e s'ambienti. Fairphone, arribau a sa versione 3, bitit custu cuncetu a is telefoneddus.
Difatis, is telefoneddus Fairphone costant de prus, ma tenint unus cantus bantaxus asuba a is telefoneddus de atrus produsidoris.

ReactOS est lòmpiu a sa versioni 0.4.13.
Incumentzaus narendi ita est ReactOS, giai chi est sa prima borta chi ndi chistionu innoi. ReactOS est unu sistema operativu lìberu in svilupu, chi punnat a essi cumpatìbili cun is programas de Windows. Bolit essi duncas un'alternativa a Linux po is usuàrius chi bolint unu sistema lìberu ma sunt acostumaus o arrechedint Windows po traballai.
Su sistema impreat cumponentis de Wine po funtzionai e est ancora in stadu alpha. Bolit nai chi no est prontu a un'impreu diàriu po traballu o po domu.

Sa privadesa de is usuàrius est bessendi unu tema de importu sèmpiri prus mannu.. e cantu ndi seus chistionendi nosu puru! Huawei, at annuntziau chi at a cambiai Google cun Qwant cumenti a motori de circa predefiniu po su navigadori web suo Huawei Browser in su telefoneddu P40.

Sigheus a chistionai de còdixi binàriu e operatzionis chi ddu pertocant. A is circùitus elètricus digitalis chi faint operatzionis cun signalis binàrius ddi nant gennas lògicas, funt oindii realizadas cun transistor miniaturizaus e sighint is règulas de s'àlgebra booleana.

A pustis de unus cantus problemas cun is telefoneddus A70, Samsung at dèpiu firmai s'annoamentu de su sistema operativu Android a sa versioni 10. Una parti de is usuàrius at tentu problemas mannus, cun telefoneddus chi signalànt sa bateria cumenti scàrriga e non s'alluiant prus. A cantu parit sa parti manna de is problemas sunt stètius signalaus de is Paisus Bàscius.

Eus biu unas cantas alternativas a Google po is circas cun sa motivatzioni de amparai sa riservadesa nosta contra a aziendas chi ant segudau una positzioni de domìniu in su cuntestu de sa tecnologia.

Si annùntziu cun prexeri mannu chi incumentzendi de oi, sa lìngua sarda est a disponimentu po su motori de circa DuckDuckGo chi s'apu giai presentau. Po custa furriadura in sardu apu donau un'agiudeddu deu puru, ma depeus torrai gràtzias a sa truma de Sardware, chi at fatu sa parti manna de su traballu. Sighint is istrutzionis po cambiai sa lìngua.

Si-ddu arregordais a Clippy, s'assistenti de is versionis de Microsoft Office de sa 97 a sa XP? Po calincunu fiat de utilidadi e fintzas spassiosu, ma po sa parti manna de is usuàrius fiat infadosu, cun is animatzionis e is cunsillus suus a sighidura. De sòlitu, finiant po ddu cuai.

Bene bènnius a sa prima pìndula de informàtica. Apa a circai de publicai un'articuleddu dònnia domìnigu pro acrarai cuncetus informàticus chi nosu ca traballaus cun elaboradoris dònnia dii connosceus cumenti a s'ABC ma funt mancai pagu crarus po is atrus.