Chrome: atentzioni a is estensionis malas

Prus de 30 estensionis de Google Chrome, su navigadori web prus impreau in su mundu, ant tentu prus de unu millione de scarrigamentus. Ddoi at sceti unu problema: custas estensionis esecutant còdixi dannàrgiu in sa computera de s'impidatori.

S'atacu funtzionat in custa manera: s'impitadori circat vìdeus o materiali de scarrigai in s'arretza. Su situ chi oferrit custus cuntènnius pedit de installai un'estensioni po sighi. Custas estensionis parint oferri sa possibilidadi de personalisai is coloris de su navigadori, e po custu is circadoris ant postu a sa campànnia "Dormant Colors" (Coloris dormendi), ma su chi faint in realidadi est scarrigai còdixi chi càmbiat is arresurtaus de is motoris de circa po amostai situs chi ant pagau po custu servìtziu.

Google e Mozilla averìguant is estensionis po s'assegurai chi no fatzant dannu, ma calincuna ndi podit fui, duncas s'atentzioni de s'impitadori est de importu.

Evitai custas e àteras estensionis prus dannàrgias est fàcili e no est diferenti meda de evitai su virus chi megat de si spainai po mèdiu de Linkedin, de chi eus giai chistionau:

• Installai prus pagu estensionis possìbili e mai de situs disconnotus (impreai sa colletzioni ofitziali);
• Impreai unu programa anti-virus cun protetzioni po sa navigatzioni;
• Cunsiderai sa possibilidadi de ndi bogai is estensionis chi no serbint de su navigadori, pruschetotu si funtzionas comenti descritu in custu artìculu o si su navigadori megat de si cumportai in manera stròlica.