Unu messàgiu in s'àrea de sa comunidadi de Wikipedia "Su tzilleri" at annuntziau ariseu chi est a disponimentu unu tradutori nou po is impitadoris chi bolint furriai una pàgina de un'àtera lìngua. Su tradutori est MinT e in custu artìculu andaus a scoberri ita est e comenti funtzionat.

Pagu apustis de is protestas mannas incumentzadas cun sa morti de Nahel Merzouk, in Frantza est passada una lei noa chi permitit a sa politzia de arregistrai datus de is dispositivus de personas suspetadas de crìminis cun assumancu cincu annus de castigu. Custus datus funt sa positzioni, s'àudiu de su micròfonu e sa màgini de sa fotocàmera de telefoneddus e àterus dispositivus chi includint custus trastus, comenti ordinadoris, tauleddas, etc.

Sa dii 30 de làmpadas de ocannu eus arriciu totus unu messàgiu de allarmi de proa de unu sistema chi ddi narant "IT-Alert". Calincunu si-nd'est atzicau, calincunu infadau, àterus dd'ant serrau chena pensamentus, ma est de interessu a castiai comenti funtzionat custu sistema, chi parit bastanti invasivu?

Fintzas s'Europa incumentzat a s'ocupai de sa spainadura de s'Intelligèntzia Artifitziali. Su Parlamentu Europeu at difatis publicau unu documentu cun arrègulas noas in contu de s'impreu de s'IA. Su documentu, innantis de tenni unu balori de vìnculu po is stadus membrus at a depi essi aproau de su Cunsillu Europeu e de sa Cumissioni Europea. Si tratat de càmbius de importu po is chi timint chi una spainadura irregulada de is programas de IA ant a portai a scenàrius tipu 1984 o Terminator.

Microsoft at annuntziau chi Cortana no at a essi prus suportau cun s'annoamentu de Windows 11 chi at a benni. Cortana, dd'arregordaus, est su programa de assistèntzia e connoscimentu vocali de Windows, introdùsiu in su 2014, su pròpiu annu de Alexa de Amazon, duus annus apustis de Siri de Apple e duus annus innantis a Google Assistant.

In s'incumentzu de sa carriera mia de programadori web mi praxiat a fai a manera chi is situs mius funtzionessint beni finas chena JavaScript e chena cookie. Acuntessiat fatu-fatu difatis chi unus cantu impitadoris ndi-ddus studessint po arraxonis de seguresa. Apustis de s'arribu de sa lei de is cookie (o testimòngius), su pensamentu miu est torrau a balli. S'informu obligatòriu in totu is situs chi bisitaus est dessintotu infadosu e po chini no ndi sciit de chistionis legalis ddoi at sèmpiri s'arriscu de fai is cosas no cunforma a is arrègulas. Balit sa pena, duncas de si domandai si est pretzisu deaberus a installai custus cookie.

Custu mesi ddoi at una pariga de noas de interessu in contu de Ubuntu, sa distributzioni de Linux prus famada po s'impreu domèsticu. Pagus diis a oi ant publicau sa versioni 23.04 "Lunar Lobster" (Aligusta Lunare) e est acabendi su suportu de sa 18.04 LTS (versioni a suportu longu). Eus a biri poita custu est de importu.

Comenti eus biu, imprendidoris e àterus personàgius funt orroliaus po is efetus de su svilupu de s'intelligèntzia artifitziali e de sa spainadura sua in totu su mundu e in totu is campus de sa vida nosta. In custu artìculu, una pariga de fueddus in contu de sa reatzioni a sa pedida insoru de blocai su svilupu de s'IA po ses mesis.

Intelligèntzia Artifitziali: nd'eus chistionau meda in s'ùrtimu annu, che medas àteras publicatzionis. In s'ùrtimu perìodu nd'intendeus dònnia dii, pruschetotu apustis de sa publicatzioni de is ùrtimas versionis de ChatGPT. Su svilupu tecnològicu de oi est lòmpiu a arresurtaus spantosus, a su puntu chi genti meda megat de s'orroliai po s'impreu chi s'umanidadi nd'at a fai in su benidori. Un'ipòtesi estrema est su "Scenàriu Terminator", chi unus cantu analistas ant elaborau. Intra de custus ddoi at fintzas genti chi iat a tenni interessu in su svilupu de s'IA, comenti Bill Gates, Elon Musk e fintzas Sam Altman, fundadori de OpenAI, su svilupadori de ChatGPT.

Apustis de unu traballu mannu de sa scuadra de Sardware durau totu su 2022, Mozilla Firefox, unu de is prus navigadoris (browser) web impreaus in su mundu, at publicau su pachetu de linguàgiu in sardu. Dd'ia annuntziau in s'acabu de su 2021 e Sardware at cumpriu sa promissa sua. No est su primu progetu chi sa scuadra fùrriat, comenti podeus biri in sa pàgina ofitziali. Ddoi funt DuckDuckGo, Telegram e àterus puru. Su pachetu de lìngua s'agiungit a su corretori ortogràficu, arribau in s'incumentzu de su 2021, frunendi un'esperièntzia in sardu prena. Andaus a castiai unu pagheddu prus de acanta.