Wikinews serrat

Si-nd'est arraxonau a tempus largus, ma a sa fini sa decisioni dd'ant liada e annuntziada de manera ofitziali: Wikinews (o Wikinoas) serrat.

Po chini no dda connoscit, Wikinews est una prataforma innui totus podint publicai noas de atualidadi, polìtica e totu su chi agataus in unu giornali calisisiat.

Su progetu no at mai atirau unu nùmeru mannu de impitadoris, ni de ligidoris, giai chi situs de noa a in donu nci nd'at medas e Wikinews no cumparit a fitianu tra is primus arresurtaus de is motoris de circa. In prus, ddoi est sa cuncurrèntzia interna de Wikipedia, innui sa genti currit a circai annoamentus candu acuntessit cosa de importu.

Po sa comunidadi de Wikipedia est unu càmbiu de importu, ca finas a imoi si circàt de no imbrutai is pàginas cun is ùrtimus acuntessimentus e de ddas ponni in dii sceti candu is acuntessimentus si stabiliànt, invitendi is impitadoris a publicai is noas in Wikinews, ma custu no fait oramai prus e at a tocai a coordinai su progetu de manera diferenti.

Sa bandu po su pùblicu mannu at a essi ghetau su 4 de abrili e su progetu at a abarrai pùblicu in modu de ligidura sceti. Difìcili a nai si a su pòpulu de Internet at a amancai Wikinews o si no si-nd'ant mancu a acatai. De seguru est unu sinnu de comenti andant is cosas in Internet: no est chi sa genti no tèngiat gana de publicai totu su chi acuntessit, ma est craru chi preferit a ddu fai in prataformas sotzialis, mancai a traessu de vìdeus curtzus. Difaits, mentras de vìdeus de denùntzia e cumentu in contu de temas de atualidadi si-ndi biint dònnia dii, podeus sinnalai su declinu de una prataforma comentu YouReporter chi fiat nàscia po ddus arragolli.