Cantas bortas chirchende carchi cosa in unu motore de chirca in su Web amus agatadu sa pròpiu pregonta in Yahoo Answers? Custu nos donaiat a su mancu su sentidu de no èssere is ùnicos tontos a tènnere cussa duda. Is rispostas de sa comunidade fiant a fitianu tontidades, ma càncua borta giai nos ant agiudadu.
In su note intre su 9 e su 10 de martzu in Strasburgo su fogu at fatu dannu a unu tzentru de datos de unu de is prus frunidores mannos de servìtzios de informàtica in sa nue (cloud computing). S'efetu de custu disacatu est chi unos cantos servìtzios e giassos web non sunt a disponimentu in custas ùrtimas dies. Custu pro ite ca su fogu at ispèrdidu una parte de is elaboradores e is tècnicos ant dèpidu istudare totu is àteros.
Un'artìculu in su blog de Kaspersky nos faghet ischire chi cun sa pandemia de COVID-19 est incumentzadu unu mercadu cuadu in su web iscuru (dark web) in ue si bendent artìculos de protetzione, comente is mascareddas, e fintzas su vatzinu, cun prètzios chi andant dae 250$ a 1200$, o tzertificados farsos de vatzinu pro is chi bolent biagiare sena ddu fàghere.
In custas dies est girende unu virus chi imbiat unu ligòngiu a is cuntatos de Messenger pregontende "Tue ses custu? Là ite apo agatadu". Faghende clic a subra a su ligòngiu biemus una pàgina chi paret sa domo de Facebook, pedende de insertare s'indiritzu de posta eletrònica e sa crae de intrada.
Dae una pariga de dies, unos cantos grupos de no-vax, persones contràrias a is vatzinos contra a su coronavirus Sars-CoV-2 responsàbile de sa maladia COVID-19, sunt publichende me is pàginas issoro un'ischema elètricu chi nanca est "su chip 5G chi sunt inferrende cun su vatzinu". Làstima ca calicunu si siat giai acatadu chi cussu ischema est de su distorsore pro ghitarra "Metal Zone" de sa Boss.
S'iscuadra de Sardware at agiudadu a bortare su situ web de s'Initziativa Tzitadina Europea #FreedomToShare, pro legalizare sa cumpartzidura de archìvios. Firmade inoghe: https://freesharing.eu/sc/. Sa cumpartzidura de cultura est de profetu pro totu sa sotziedade!
Comente annuntziadu in duas noas de s'ANSA, Twitter at detzìdidu de bogare is messàgios cun noas farsas a pitzus de is vatzinos contras a su Coronavirus. Youtube in s'ìnteri at incumentzadu a bogare is vìdeos cun sa teoria de s'ingannu de is eletziones in is Istados Unidos, bìnchidas de Biden, cun Trump chi sighit a decrarare chi issu ddas apat bintas cun s'ingannu.
Est faghende su giru de su Web in custas dies sa noa de is ativistas Anti-5G chi ant pigadu una gàbbia de Faraday pro blocare is undas eletromannièticas de s'incamminadore de retze (router) e a pustis si nde sunt chesciados pro ite ca sa retze WiFi no funtzionaiat prus.
Non si cumprendet bene ite nc'intrent custos dispositivos domèsticos cun su 5G: podet èssere chi, a su sòlitu, is prus pagu espertos confundant su 5G de sa telefonia mòbile cun is retzes WiFi a 5Ghz, duas cosas de s'in totu diferentes. Craru chi una gàbbia de Faraday progetada pro blocare is undas a 5Ghz at a blocare s'arretza WiFi (tantu balet a dd'istudare) e comente e chi siat non serbit a nudda contras a su 5G.
De ogetos che custu si nd'agatant medas in Amazon e a nàrrere sa beridade no est sa primu borta chi nd'intendemus chistionare, giai chi carchi borta agatamus fintzas in is potecarias cussos "còrgios" pro telefoneddos chi diant a dèpere blocare is undas.
Is eletziones in is Istados Unidos parent fatas, ma Facebook at detzìdidu de blocare pro un'àteru mese totu is annùntzios polìticos e de lassare ativu su Tzentru de Informatzione a pitzus de su votu pro sighire a controllare su contu de is votos, chi est prus longu pro more de su votu postale, chi gente meda at seberadu pro sa dificultade de si mòere de domo in mesu a sa pandemia de Covid-19.
A pustis de s'antitrust americanu, puru s'anti-monopòliu italianu ipotizat un'abusu de sa positzione de domìniu de Google. Su problema custa borta est s'impreu de is datos pro s'elaboratzione de sa publitzidade.
Google est istada acusada de impedumare a is aziendas concurrentes de pònnere elementos de sighidura de sa navigatzione in su web de is usuàrios pro èssere s'ùnica a pòdere regollere custos datos.
