Su sistema /e/ est a disponimentu pro Fairphone 3

Bos regordades de Fairphone, su telefoneddu èticu?
Erisero ant annuntziadu chi su sistema /e/ est a disponimentu pro s'ùrtima versione de su telefoneddu, Fairphone 3.

/e/ est una distributzione de Android, basada subra LineageOS (sa pròpiu base de Replicant) e chi, comente narant issos etotu, est deGooglizada. Bolet nàrrere chi totu is servìtzios de Google sunt istados cambiados cun àteros chi respetant sa riservadesa de is usuàrios. Sa punna de /e/, est difatis frunire unu sistema operativu pro aparatos mòbiles chi siat cumpatìbile cun is aplicatziones pro Android, chi siat a còdighe abertu, pro-privatesa e fàtzile de impreare. /e/ est oe a disponimentu pro 92 mollos de telefoneddu e unos cantos de issos, incluidu Fairphone 3, est possìbile a ddos comporare cun custu sistema pre-installadu.

Sa disponibilidade de custu sistema pro Fairphone est sena duda una noa bella, ca una chèscia tìpica in contu de su Fairphone est s'impreu de su sistema de Google, cunsideradu pagu respetosu de sa riservadesa.