Sa Tzina impreat s'app anti-Covid pro blocare una manifestada

Su chi gente meda timiat cando at intèndidu chistionare pro sa prima borta de s'app contra a sa COVID-19 est acontèssidu in Tzina: su guvernu at impreadu su programma pro blocare a persones medas chi fiant ponende·si in biàgiu pro manifestare contra a sa banca printzipale de su paisu.

Intre is timorias in sa base de su flop de Immuni e de àteras in Europa ddoe fiat sa possibilidade chi is guvernos diant a àere acabadu impreende custas aplicatziones pro limitare sa libertade de is persones, e su chi amegat de acontèssere in Tzina no agiudat sa cunfiàntzia cun custa genia de trastos.

Totu est incumentzadu domìnigu passadu, cando gente meda si nd'est acatada chi su dinari chi teniat in banca fiat blocadu o isparèssidu. A custu puntu est incumentzada una protesta manna a in antis a sa sede de sa banca, fintzas cun islogan contra a su guvernu. Sa politzia at impreadu sa violèntzia pro nche ddos istesiare de in cue e su guvernu at autorizadu s'impreu de is notìficas de s'aplicatzione anti-Covid pro proibire de si mòere a is chi fiant pighende is mesos pùblicos pro s'unire a sa protesta.

Tocat a nàrrere, pro onestade, chi custa possibilidade cun s'app Immuni est unu pagu prus complicada, ca cussa impreat unu còdighe numèricu chi, in teoria, no est assotziadu a su nòmine de sa persone chi dda portat in su telèfonu e chi sa sighidura de is cuntatos si faghet cun su Bluetooth chene coordinadas GPS, duncas sa privatesa est prus proteta chi non cun s'app tzinesa chi, comente contat Internazionale, est essida che a unu passi pro cale si siat movimentu de sa die: s'iscenàriu chi persones medas ant tìmidu de prus in Europa etotu. Tocat però a si regordare puru chi ddoe at prus de una duda, comente amus giai bidu, chi custos programmas non siant respetosos de a beru de is impitadores.

Su chi amegat de acontèssere in Tzina, una banca chi furat su dinari de is clientes issoro e su guvernu chi dda proteghet cun s'impreu de unu trastu tecnològicu chi depiat serbire a amparare a cuddas persones etotu, depet lassare amargados a totus e èssere fintzas un'avertimentu pro su benidore. Diat a èssere una faddina manna a pensare chi su chi faghent in un'istadu ghiadu dae una ditadura a tesu dae nois non si tochet pro nudda in cust'ala de su mundu. At a èssere fintzas tempus de annoare sa carta de is Deretos Umanos pro amparare a is persones dae su controllu e s'invasione de sa vida privada cun trastos tecnològicos? Is sinnales narant ca ei.

Fontes:

• https://ilmanifesto.it/derubati-dei-risparmi-dalle-banche-protesta-in-cina-la-polizia-picchia-e-arresta
• https://www.fanpage.it/esteri/proteste-in-cina-risparmiatori-truffati-assaltano-le-banche-il-governo-li-blocca-con-lapp-covid/