Agiudare sa chirca subra su Coronavirus sena isfortzos

Totus, in una manera o in s'àtera, semus contribuende a gherrare contra custa pandèmia, chie ocupende·si de is malàidos, chie donende carchi soddu a su prontu sucursu e chie abarrende in domo pro evitare casos noos. Creo chi in medas de nois, comente si siat, abarret sa gana de fàghere de prus e bos potzo propònnere una manera chi non bos at a espònnere a perunu arriscu e a peruna pelea.

Ais mai intesu faeddare de càrculu distribuidu? In pràtica, ddoe at progetos de chirca chi recherent una cantidade manna de càrculos matemàticos, duncas de potèntzia manna e diant serbire elaboradores gastosos meda pro ddus fàghere. Sa mègius solutzione pro acumprire custos càrculos est cudda de ddos truncare in unidades minores e ddas esecutare in is elaboradores de milliones de voluntàrios isparidos pro su mundu. Su progetu Rosetta@home at decraradu chi su traballu suo, e tando su contributu de is voluntàrios suos, est agiudende sa chirca subra su Coronavirus. Nois puru podimus contribuire ponende a disponimentu sos elaboradores, tauleddas e telefoneddos nostros.

Bidimus passu-passu comente fàghere.

1. Iscarrigade e installade BOINC. Is impitadores Linux ddu podent agatare cun su pròpiu gestore de pachetes e is impitadores Android in su Play Store. BOINC est sa prataforma de s'Universidade de Berkeley chi vàrios progetos de càrculu distribuidu podent impreare comente a base.
2. Aberide BOINC Manager. Pro primu, bos pedit de arratzare unu progetu pro contribuire. Isseberare Rosetta@home.
3. Bos pedit de fàghere s'atzessu a su contu bostru de BOINC o de nde creare unu nou. At a bastare a indicare un'indiritzu de posta eletrònica e una crae.
4. Cando ais fatu s'atzessu, su programma at a fàghere totu a solu: at a iscarrigare sas unidades de traballu, at a fàghere is càrculos in is momentos de impreu minore de su dispositivu e at a imbiare is resurtados a su serbidore cando at finidu. Ogni borta chi su programma imbiat is datos, si retzint crèntias. Custas non tenent un'usu pràticu, ma isceti che a reconnoschimentu de su pròpiu contributu.

Si tenides s'impressione chi BOINC carcat tropu s'aparatu bostru (pro esempru chi si callentat, sa bentrera faghet carràrgiu o s'impreu de sa memòria s'àrtziat tropu) est possìbile abèrrere is issèberos e reduire su tempus de CPU e sa pertzentuale de memòria impreados fintzas cando no agatades is balores primorosos. Non bògio chistionare tropu de custas minudas, ma si tenides problemas, sentide·bos lìberos de mi iscrìere e apa a chircare de bos agiudare.