S'averìguu de s'identidade pro is sitos porno

A incumentzare dae su 12 de su mese de onniasantu de su 2025 is impitadores ant a èssere obligados a frunire is datos issoro a is sitos pornogràficos (o, a su mancu, a is sitos de una lista frunida dae su ministèriu) de manera chi custos si potzant assegurare chi s'impitadore tèngiat 18 annos o prus. S'averìguu s'at a fàghere impreende su SPID o àteros trastos de identidade digitale.

S'idea, naradu craru, est tonta e dannàrgia, tìpica de unu guvernu inniorante o in fide mala.

Tonta, ca:

• cale si siat pitzocheddu ischit ite est una VPN, ischit chi unas cantas sunt a in donu e fintzas incorporadas in unos cantos navigadores (Òpera e Vivaldi, pro nàrrere);
• is prataformas ant a finire pro istraviare is averìguos ponende sitos "mirror" chi ant a cambiare indiritzu cada mese comente faghent giai Altadefinizione e àteros;
• unu pitzocu cun hardware bellu podet installare unu mòlliu de IA in domo, generare vìdeu a sa sola e ddos imbiare a is amigos, narende adiosu a is averìguos.

E dannàrgia ca:

• donat datos personales a giassos cun sede a foras de s'UE;
• at a incoragire is impitadores a chircare materiale prus pagu averiguadu.
  Pragat o no, a su mancu Youporn e àteros avèrguant is vìdeos chi ddoe càrrigant pro s'assegurare chi non siant òpera de violèntzia. Me is tzarradas criptadas e in su dark web custu amparu no esistit.
  Calicunu at a pòdere nàrrere chi mancu s'averìguu de is prataformas est perfetu, e est beru, ma tocat a nàrrere puru chi a pustis de is iscàndalos de una pariga de annos a oe, calicuna de is prataformas ant detzìdidu de atzetare isceti vìdeos dae impitadores averiguados e de nde bogare totu is vìdeos chi pintant iscenas de violèntzia, mancari retzitada;
• su puntu pretzedente at a fàghere torrare a pensare a fintzas a peus medidas comente a su "chat control" chi pro immoe dormit ma no est de su totu abbandonadu;
• ismurrat e no èducat: no informat in contu de su filtru famìlia (o parental control), chi podet èssere ativadu in is aparatos, e no ispricat chi a is pitzocos a suta de una tzerta edade non diat dèpere èssere permìtidu a arrolliare in Internet sena supervisione.

A sa fine, si donat un'àtera solutzione chi non giuat. Si nde bogat sa responsabilidade a is famìlias chi nanchi si bolet amparare e si complicant in manera inùtile cosas chi diant pòdere èssere prus simpres cun unu mìnimu de imparu, pro arribbare a nudda o, peus, a fàghere prus dannu. In manera paradossale, custu guvernu at a acabbare pro èssere ammentadu comente a su chi at vietadu su porno a is eletores suos de riferimentu, chi comente a informàticu bos potzo assegurare chi sunt tra is consumadores prus fitianos de pornografia: indivìduos de mesu edade o de edade avantzada inniorantes de cosa digitale e chi no ischint impreare ne una VPN nen su SPID.