Meta AI est incumintzende a chistionare sardu

Torramus a faeddare de Meta AI. Mentres fia iscriende s'ùrtimu artìculu, apo detzìdidu de fàghere una proa cun su chatbot de Meta, a bìdere si cumprendiat su sardu. Su resurtadu est de interessu.

Tocat a nàrrere chi àteras chat renessent a iscrìere unu pagu de sardu. ChatGPT, pro nàrrere, mancari cun faddinas e ammisturende unu pagu sa norma de variedades diferentes, a bortas rispondet puru in limba sarda. Meta AI leat datos de is profilos de is impitadores pro s'annestru e duncas mi fia preguntende si su sardu chi s'iscriet in Facebook e Instagram bastat pro isvilupare unu linguàgiu chi s'acostet a su de is umanos, cunsiderende puru chi sardos medas iscrient su sardu impreende is règulas de s'italianu e duncas ponent paragògicas, elisiones, dòpias chi in sardu non s'impreant, una grammàtica italianizada, etc.

Apo proadu una cosa simpre: apo domandadu prus de una borta a su chatbot de mi dare sa retzeta de is pabassinos. Bos lasso inoghe in bàsciu su vìdeu de una de is proas.
Sa risposta est cambiada ònnia borta. A bortas m'at dadu luego sa retzeta, àteras m'at domandadu prus informatziones. Su chi est istadu semper che pare est chi in s'incumentzu m'at rispostu in sa limba mia de sistema (ispanniolu in su vìdeu). Cando apo torradu a domandare de m'iscrìere sa retzeta in sardu at incumentzadu a dd'iscrìere, ma a pustis su messàgiu est cambiadu cun s'informatzione chi su sistema non cumprendet ancora su sardu ma chi m'at a avisare cando dd'at a fàghere. Custu acontesset forsis pro una limitatzione chi Meta at postu. Si bidet chi Meta AI tenet una lista de limbas suportadas e su sardu no est ancora intra custas.

Si andamus a castiare su chi fiat iscriende in antis de si firmare, bidimus chi si tratat de un'iscritura grussera, chi ammisturat variedades de sardu, LSC e faeddos chi parent pigados dae àteras limbas. Paret craru però chi s'Inteligèntzia Artifitziale de Meta siat giai bona a cumprèndere pregontas simpres in limba sarda e chi cun unu pagu de annestru in prus at a èssere bona a cumprèndere prus o mancu totu e a rispondere sighende sa grammàtica giusta e un'ortografia chi sigat is normas.

Non totus dda pensant a sa pròpiu manera in contu de resurtados che custu: calicunu est cuntentu chi Facebook non siat bonu a cumprèndere su sardu ca est una manera pro nche fuire dae sa tzensura e dae sa regorta de datos personales; àteros pensant imbetzes chi siat una cosa positiva, ca permitit de tènnere prus trastos informàticos in limba sarda e duncas de nde megiorare su status de limba normale, tratada che totu is àteras. Una cosa est segura: mentres is impitadores sunt interessados a trastos de IA, e no ischimus ancora si est isceti una moda chi at a passare, prus is aziendas ant pònnere dinari in custos trastos, megiorende·ddos e faghende a manera chi cumprendant fintzas is limbas de minoria. Pro contras, no ischimus cantos siant interessados a tènnere chatbot e assistentes chi faeddent sardu, duncas est difìtzile a nàrrere cantu custa abilesa s'at a isvilupare in su benidore.