Facebook preparat s'IA sua, impreende is datos tuos

A pagu a pagu, is impitadores de Facebook sunt retzende unu messàgiu pro ddis comunicare chi Meta at a impreare is datos issoro pro addestrare is funtzionalidades noas de inteligèntzia artifitziale. Bidimus in curtzu ite bolet nàrrere e ite podimus fàghere si sa cosa non nos faghet praghere.

De inteligèntzia artifitziale amus faeddadu meda me is meses passados. Si tratat de algoritmos chi sìmulant su protzessu de detzisione de unu cherbeddu umanu impreende càrculos statìsticos. In s'ùrtimu annu, custu tipu de programma at ofertu resurtados ispantosos, essende bastante bonu de simulare unu linguàgiu naturale in un'arresonu, creende immàgines e vìdeos e àtera cosa meda. A un'algoritmu de IA de sòlitu pro pòdere funtzionare comente si tocat, ddi faghet bisòngiu a passare pro una fase de addestramentu, in ue ddis frunint datos reales chi permitint de afinare is resurtados.

In custu perìodu s'interessu in contu de is servìtzios chi impreant s'IA est mannu e duncas is prus aziendas de importu chircant de nde tènnere unu pro non lassare calare su balore issoro in su mercadu finantziàriu. Su matessi est acontèssidu me is annos de su boom de is diàrios in lìnia (blog) e a pustis de is retzas sotziales, cando fintzas Google at creadu sa retza Google+, progetu serradu unos cantu annos a poi. Meta est trighende a isvilupare un'IA sua ma est preparende·si a incumentzare s'addestramentu impreende su patrimòniu de datos de is iscritos a sa prataforma. Calicunu de nois difatis at giai retzidu una notìfica che custa:

e faghende clic a subra, nde essit custu messàgiu:

Impitadores chi non sunt cuntentos de custu impreu de is datos issoro duncas podent profetare de su deretu de opositzione faghende clic in su ligòngiu chi bident in su messàgiu

e in sa pàgina chi nde essit faghet a argumentare s'impreu de is datos nostros. A sa fine de totu Facebook at a imbiare una notìfica de cunfirma, che custa:

Impitadores chi no ant (ancora) retzidu sa notìfica e non bolent abarrare abetende·dda, podent sighire puru custu ligòngiu e seberare de non lassare impreare is datos pro addestrare s'IA.

Est pretzisu a regordare chi custu no at a blocare totu s'impreu de is datos nostros chi faghet Facebook, giai chi sa prataforma est "a indonu" in càmbiu de su manìgiu de is datos cun sa punna prus che totu de personalizare sa publitzidade chi bidimus in s'ìnteri de sa navigatzione.