Meta AI est incumintzendi a chistionai sardu

Torraus a fueddai de Meta AI. Mentri fia scriendi s'ùrtimu artìculu, apo decìdiu de fai una proa cun su chatbot de Meta, a birri si cumprendiat su sardu. S'arresurtau est de interessu.

Tocat a nai chi àteras chat arrannescint a scriti unu pagu de sardu. ChatGPT, po nai,  mancai cun faddinas e ammesturendi unu pagu sa norma de variedadis diferentis, a bortas arrespundit puru in lìngua sarda. Meta AI liat datus de is profilus de is impitadoris po s'annestru e duncas mi fia preguntendi si su sardu chi si scriit in Facebook e Instagram abastat po svilupai unu linguàgiu chi s'acostit a su de is umanos, cunsiderendi puru chi sardus medas scriint su sardu impreendi is arrègulas de s'italianu e duncas ponint paragògicas, elisionis, dòpias chi in sardu no s'impreant, una gramàtica italianizada, etc.

Apu proau una cosa simpri: apu domandau prus de una borta a su chatbot de mi giai s'arretzeta de is pabassinus. Si lassu innoi in bàsciu su vìdeu de una de is proas.
S'arrespusta est cambiada dònnia borta. A bortas m'at giau luegus s'arretzeta, àteras m'at domandau prus informatzionis. Su chi est stètiu sèmpiri che pari est chi in s'incumentzu m'at arrespostu in sa lìngua mia de sistema (spanniolu in su vìdeu). Candu apu torrau a domandai de mi scriri s'arretzeta in sardu at incumentzau a dda scriri, ma apustis su messàgiu est cambiau cun s'informatzioni chi su sistema no cumprendit ancora su sardu ma chi m'at a avisai candu dd'at a fài. Custu acuntessit forsis po una limitatzioni chi Meta at postu. Si biit chi Meta AI tenit una lista de lìnguas suportadas e su sardu no est ancora intra custas.

Si andaus a castiai su chi fiat scriendi innantis de si firmai, bideus chi si tratat de una scritura grussera, chi ammesturat variedadis de sardu, LSC e fueddus chi parint pigaus de àteras lìnguas. Parit craru perou chi s'Intelligèntzia Artifitziali de Meta siat giai bona a cumprendi pregontas simpris in lìngua sarda e chi cun unu pagu de annestru in prus at a essi bona a cumprendi prus o mancu totu e a arrespundi sighendi sa gramàtica giusta e un'ortografia chi sigat is normas.

No totus dda pensant a sa pròpiu manera in contu de arresurtaus che custu: calincunu est cuntentu chi Facebook no siat bonu a cumprendi su sardu ca est una manera po nci fui de sa censura e de s'arregorta de datus personalis; àterus pensant invecis chi siat una cosa positiva, ca permitit de tenni prus trastus informàticus in lìngua sarda e duncas de nd'amellorai su status de lìngua normali, tratada che totu is àteras. Una cosa est segura: mentris is impitadoris funt interessaus a trasus de IA, e no scieus ancora si est sceti una moda chi at a passai, prus is asiendas ant ponni dinari in custus trastus, amellorendi-ddus e fadendi a manera chi cumprendant fintzas is lìnguas de minoria. Po contras, no scieus cantus siant interessaus a tenni chatbot e assistentis chi fueddint sardu, duncas est difìcili a nai cantu custa abilesa s'at a svilupai in su benidori.