Duus passus ainnantis apitzus de sa guardiania biomètrica

Duus passus ainnantis apitzus de sa guardiania biomètrica

Màgini de StockSnap pigada de Pixabay

Comenti apu spricau prus bortas in custu diàriu, sa spainadura de is tecnologias de inteligèntzia artificiali est creendi unus cantu problemas a sa privatesa nosta, sendi chi cun s'impreu insoru bessit prus fàcili a sighi s'atividadi de is personis, in lìnia e in sa vida reali. Sa rivista Wired chistionat de duas noas chi si faint sperai chi is pràticas de sighidura digitali acabint o assumancu siant redùsias.

Sa primu noa est sa decisioni de s'Unioni Europea de obligai s'Agentzia Esecutiva po sa Circa a publicai is datus de sa circa apitzus de una tecnologia chi iat a depi permiti de averiguai si una personi est contendi fàulas, gràtzias a s'anàlisi de is espressionis de sa faci. Comenti po totu is tecnologias de custa genia si creant difatis problemas chi pertocant is datus personalis memorizaus, sa possibilidadi chi funtzionint mellus cun unus cantus grupus ètnicus chi no cun àterus (e duncas problemas de discriminatzioni) e, craru, s'ètica de abarrai sighendi dònnia movimentu de dònniunu de nosu totu su tempus cun sa scusa de sa seguràntzia.
De importu est su contu, in sa noa etotu, de sa giornalista chi at pòtziu proai custa tecnologiacun un'arresurtau de su totu sballiau. Si custu fessit acuntèssiu in un'aplicatzioni reali de averìguu, no est difìcili a imaginai chi seguru una personi s'iat a essi agatada in mesu a un'imbìstigu de politzia chena de un'arraxoni bera. Est su pròpiu problema de sa màchina de sa beridadi clàssica chi bieus me is pellìculas e chi no funt mai stètias afidàbilis.

Sa segunda noa pertocat sa decraratzioni a banda de sa Frantza chi is servìtzius de sa sotziedadi americana de connoscimentu faciali Clearview Ai funt contras a sa lei. Custa sotziedadi arregolliat màginis de caras chena permissu po podi fruniri servìtzius de identificatzioni a sa politzia. No est su primu stadu chi at proibiu custa atividadi: innantis ddoi est su Canada, s'Austràlia, su Rennu Auniu e ddoi at fintzas un'imbìstigu in Itàlia.

A is interessaus a custu tema, cunsillu de s'informai apitzus de sa campànnia "Torra a ti pigai sa faci", chi pedit sa proibidura de custas pràticas.

Cumenta

Categorias