Duos passos a in antis a pitzus de sa guardiania biomètrica

Comente apo ispricadu prus bortas in custu diàriu, s'ispainadura de is tecnologias de inteligèntzia artifitziale est creende unos cantos problemas a sa privatesa nostra, sende chi cun s'impreu issoro essit prus fàtzile a sighire s'atividade de is persones, in lìnia e in sa vida reale. Sa rivista Wired chistionat de duas noas chi nos faghent isperare chi is pràticas de sighidura digitale acabbent o a su mancu siant redùsidas.

Sa prima noa est sa detzisione de s'Unione Europea de obligare s'Agentzia Esecutiva pro sa Chirca a publicare is datos de sa chirca a pitzus de una tecnologia chi diat a dèpere permìtere de averiguare si una persone est contende fàulas, gràtzias a s'anàlisi de is espressiones de sa fache. Comente pro totu is tecnologias de custa genia si creant difatis problemas chi pertocant is datos personales memorizados, sa possibilidade chi funtzionent mègius cun unos cantos grupos ètnicos chi non cun àteros (e duncas problemas de discriminatzione) e, craru, s'ètica de abarrare sighende ònnia movimentu de onniunu de nois totu su tempus cun s'iscusa de sa seguràntzia.
De importu est su contu, in sa noa etotu, de sa giornalista chi at pòdidu proare custa tecnologia cun unu resurtau de su totu isballiadu. Si custu fessit acontèssidu in un'aplicatzione reale de averìguu, no est difìtzile a immaginare chi seguru una persone si diat a èssere agatada in mesu a un'imbìstigu de politzia chene de una resone bera. Est su pròpiu problema de sa màchina de sa beridade clàssica chi biemus me is pellìculas e chi no funt mai istètidas afidàbiles.

Sa segunda noa pertocat sa decraratzione a banda de sa Frantza chi is servìtzios de sa sotziedade americana de connoschimentu fatziale Clearview Ai funt contras a sa lege. Custa sotziedade regolliat immàgines de caras chene permissu pro pòdere frunire servìtzios de identificatzione a sa politzia. No est su primu istadu chi at proibidu custa atividade: in antis ddoe est su Canada, s'Austràlia, su Rennu Unidu e ddoe at fintzas un'imbìstigu in Itàlia.

A is interessados a custu tema, cussìgiu de s'informare a pitzus de sa campànnia "Torra a ti pigare sa fache", chi pedit sa proibidura de custas pràticas.