Firefox est incumintzendi a chistionai sardu

Firefox, unu de is prus navigadoris web impreaus in su mundu, est a disponimentu in versioni Nightly in sardu.
Nd'at donau s'annùntziu Sardware, chi est aprontendi sa furriadura, ariseu 16 de donniasantu.
Sa Nightly est una versioni chi includit is ùrtimus càmbius, mancai custus potzant essi pagu stàbilis, innantis chi siant publicaus in una versioni bera de su programa. Sa lìngua sarda est prus o mancu a su 33%, duncas partis medas de testu ant a essi amostadas in inglesu, ma est un'incomentzu po podi sighi a traballai cun s'agiudu de sa comunidadi, chi podit cunsillai càmbius e sinnalai faddinas. Fatu custu, su sardu at a bessiri una de is lìnguas ofitzialis de Firefox candu lompit a su 100% de sa tradutzioni. Agiungu innoi s'annùntziu ofitziali de Sardware, cumbidendi a totus a proai Firefox in sardu e agiudai, si bolint. Pregontas, sinnalatzionis e cunsillus podint essi fatus in su Grupu Telegram de Sardware.

Salude! S'iscuadra de Sardware est traballende a sa localizatzione de su navigadore lìberu Mozilla Firefox.
Amus traduidu bastante pro otènnere de publicare su traballu giai fatu in Firefox Nightly, una versione "pre-alfa" chi serbit mescamente pro fàghere is proas de totu is isvilupos in antis de ddas pònnere in su Firefox istàbile comente atualizatziones.
Tenimus bisòngiu de gente chi dda proet e chi nos sinnalit faddinas eventuales, tràmite su canale Telegram de Sardware o is redes sotziales.
Pensamus chi potzat èssere un'ocasione bella pro ònnia utente pro bìdere su traballu fintzas una manera pro passare a un'aplicatzione lìbera e a còdighe abertu che a Firefox!
Pro installare Firefox Nightly in s'elaboradore tuo, sighi custa ghia:
1) Bae a Firefox Nightly
2) Dae su primu menù a cortina, seletziona Firefox Nightly; dae su segundu, seletziona su sistema operativu tuo; dae su de tres, chirca "Sardinian - Sardu" e seletziona·ddu;
3) Incarca "Download Now" pro ddu iscarrigare, e a s'acabu installare!