Sighit sa petitzioni contras a sa guardiania biomètrica

"S'aconnoscimentu faciali podit e at a essi impreau contras a donniunu de nosu de is guvernus e is multinatzionalis" - Custa est sa presentada po sa petitzioni ofitziali a sa Cumissioni Europea "Torra a ti pigai sa faci" po su bandu de sa guardiania biomètrica e duncas contras a sa possibilidadi de essi connotu de sistemas automàticus aundisisiat s'agataus.

Imaginaus de scoberri una dii chi un'asienda de guardiania teniat s'incàrrigu de ponni is telecàmeras me is arrugas de sa bidda e me is butegas nostras preferias. Custa asienda sciit totu de is costumàntzias nostas: innui andaus, candu ddoi andaus, cantu abarraus, ita pigaus me is butegas e mancai cali reatzionis nosi donant is prodotus chi bieus (eja, unu programa de inteligèntzia artificiali podit cumprendi s'espressioni de sa cara). No teneus idea de ita at a fai s'asienda de guardiania cun custus datus: chini totu ddus podit biri, a chini ddus bendint, si ddus cumpartzint cun is autoridadis e poita. Creu chi a nemus iat a fai prexeri una cosa de aici, fintzas si no tenit nudda de cuai: su deretu a s'intimidadi no ddu pedint sceti is criminalis, po custu poneus is tendas a is ventanas, no?
Tocat a fai atentzioni, poita ca ddoi funt giai asiendas chi impreant giai is fotografias po bendi servìtzius de identificatzioni e sighidura, comenti nosi fait sciri Wired.

Po custa arrexoni, cumbidu totus a firmai sa petitzioni e cumbidai a is amigus a fai sa pròpiu cosa.