WineWDM: programmas pro Windows 3.1 in Windows 11

In su nùmeru 4 de sa revista de Ite mi Contas apo faeddadu, chirchende de èssere prus craru possìbile, de su progetu Wine e de comente custu permitit de impreare is programmas pro Windows in Linux e àteros sistemas tipu-Unix. Apo fintzas ispricadu comente dd'installare e chi tra is programmas chi faghet a impreare ddoe sunt is pro Windows 3.0 e 3.1 (programmas a 16 bit), chi is ùrtimas versiones de Windows non suportant prus.
Sa parte de Wine chi ddu permitit est impreada fintzas in un'àteru progetu: WineWDM.

Depides ischire in antis de totu chi Windows est cambiadu meda cun su tempus, adatende·si a su caminu de sa tecnologia, e is programmas si sunt adatados a custos càmbios, ponende·ddos a profetu pro ofèrrere prus funtziones e megiorare s'atòliu. Est comente chi a pagu a pagu Windows e is programmas apant imparadu a faeddare un'àtera lìngua.

Windows chircat de apoderare sa cumpatibilidade cun programmas prus betzos, ma cun s'arribu de is sistemas a 64 bit nd'at bogadu sa possibilidade de impreare programmas a 16 bit, cunsiderados oramai tropu betzos pro èssere de utilidade. Calicunu de nois però mancari s'ispàssiat ancora cun unu gioghigheddu de cuss'època o impreaiat unu programma chi funtzionaiat bene meda e non dd'at mai bòlidu cambiare in totu custos annos. Ddoe est sa possibilidade de impreare DosBox o una màchina virtuale cun MS-DOS (o FreeDos) e Windows 3.1 installadu. Est una solutzione chi non costat nudda e funtzionat bene meda, ma si preferides a tènnere s'integratzione màssima cun su sistema e nissunu àteru programma de pònnere intramesu, podides proare WineWDM. S'iscàrrigat dae inoghe e a pustis de dd'àere installadu is programmas pro Windows 3.1 ant a torrare a funtzionare comente cale si siat àteru.

Comente funtzionat WineWDM, a suta a su còfanu?
Sende chi Windows a 64 bit non suportat prus una de is funtziones chi Windows a 16 bit impreaiat, WineWDM depet a primu emulare unu protzessore betzu pro fàghere funtzionare is istrutziones a 16 bit. Segundu, impreat su còdighe de Wine chi traduet is funtziones de Windows a 16 bit in istrutziones a 32 bit. A ùrtimu, ddoe sunt àteras cunversiones. Pro nàrrere, me is ùrtimas versiones de Windows, is programmas non podent iscrìere in sa cartella C:\WINDOWS. Si unu programma a 16 bit chircat de ddu fàghere, WineWDM iscriet s'archìviu in una cartella dedicada. De custa manera, su programma pro Windows 3.x agatat s'ambiente giustu pro funtzionare.