Su Parlamentu Europeu ghetat sa prima lege pro s'IA

Fintzas s'Europa incumentzat a s'ocupare de s'ispainadura de s'Inteligèntzia Artifitziale. Su Parlamentu Europeu at difatis publicadu unu documentu cun règulas noas in contu de s'impreu de s'IA. Su documentu, in antis de tènnere unu balore de vìnculu pro is istados membros at a dèpere èssere aprovadu dae su Cussìgiu Europeu e dae sa Cummissione Europea. Si tratat de càmbios de importu pro is chi timent chi un'ispainadura irregulada de is programmas de IA at a portare a iscenàrios tipu 1984 o Terminator.

Su documentu creat tres categorias de impreu de s'IA: arriscu bàsciu, arriscu artu e arriscu de no atzetare.
Intre is arriscos chi non faghet a atzetare ddoe sunt sa classificatzione de s'afidabilidade de is tzitadinos segundu is cumportamentos issoro. Is chi timent duncas is sistemas a sa tzinesa chi assìnniant puntos a is persones podent abarrare prus trancuillos.

Un'àteru impreu chi diat a èssere proibidu est s'identificatzione biomètrica, comente si pedit giai dae ora in una campànnia ispainada in totu su mundu. Paret duncas chi unos cantu impreos giai cunsiderados in Itàlia, su de installare telecàmeras cun connoschimentu de is caras e s'algoritmu Giove chi diat a dèpere intzertare is crìmines in antis chi custos siant fatos de a beru, ant a dèpere èssere abbandonados o minimados pro sighire is règulas noas.

Si su documentu passat, ddoe ant a èssere fintzas lìmites pro is algoritmos de IA chi ingendrant cuntènnidos. Custos difatis s'ant a dèpere connòschere a discansu pro non fàghere pensare a sa gente chi siant fatos cun manu umana. Est de importu pro cuntrastare is farsos chi amegant de girare in Internet dae cando ChatGPT e àteros trastos si sunt ispàrghidos in sa retze. Unu problema pigadu in sèriu fintzas me is USA, in ue est essende unu crìmine.