Facebook sighit a blocare sa publitzidade polìtica in is USA

Is eletziones in is Istados Unidos parent fatas, ma Facebook at detzìdidu de blocare pro un'àteru mese totu is annùntzios polìticos e de lassare ativu su Tzentru de Informatzione a pitzus de su votu pro sighire a controllare su contu de is votos, chi est prus longu pro more de su votu postale, chi gente meda at seberadu pro sa dificultade de si mòere de domo in mesu a sa pandemia de Covid-19.

Sa resone de custa detzisione serbit a chircare de firmare s'isparghidura de noas farsas, prus che totu dae su presidente Donald Trump chi refudat de ammìtere sa vitòria de s'aversàriu, sighende a denuntziare trobeddos chi no est mai resèssidu a cumproare.

Unu mecanìsmu de sa pròpiu ratza fiat istadu istantargiadu pro controllare is noas a pitzus de su Coronavirus.