Est acabadu oe su suportu pro Windows 7 e 8

Windows 7 est istada una versione de su sistema Microsoft istimada meda dae is impitadores, chi dd'ant bidu comente su sutzessore perfetu de Windows XP a pustis de su fallimentu de Windows Vista, publicadu in presse e tropu grae pro sa parte manna de is computeras chi esistiant insandus. Sa versione 8 no est istada amada che sa 7, ma mancu odiada che Vista. Est istada una versione de passàgiu in unu perìodu in ue Microsoft chircaiat de si pigare una parte de su mercadu in su mundu de is sistemas pro dispositivos mòbiles. Teniat duncas su bantàgiu de èssere lèbiu e lestru in s'aviu. Comente si siat, in su perìodu de Windows 7 e 8 is cumputadores bèndidos sunt istados medas, duncas s'11% de is elaboradores acapiados a sa retza impreant ancora sa versione 7 e un'àteru 3,59% impreant is versiones 8 e 8.1. Totu custos impitadores ant a fàghere bene a chircare un'alternativa, ca is sistemas issoro no ant a retzire prus annoamentos.

Windows 7 est arribadu in su mercadu in su 2009, Windows 8 in su 2012 e Windows 8.1 in su 2013, duncas semus chistionende de sistemas de deghe annos a oe o prus, chi si podiant annoare cun su sòlitu trastu Windows Update gràtzias a su programma Extended Security Update. Is annoamentos arràngiant faddinas e amparant su sistema dae virus e àteros ameletzos. Sunt duncas de importu mannu, prus che totu oe in die ca is computeras sunt totu acapiadas a sa retza in ue podent èssere atacadas in cale si siat momentu.

Ita tocat a fàghere duncas?
Sa parte manna de is elaboradores bèndidos intra su 2012 e 2015 (annu de essida de Windows 10) faghet ancora a ddos impreare oe in die. Su cussìgiu miu est de proare una distributzione de Linux, comente pro esempru Ubuntu. Pro is dispositivos prus antigus ddoe at versiones lèbias comente Xubuntu e Lubuntu. Chi si serbit Windows a marolla, podides intentare cun Windows 11 o mancari su 10 chi est ancora suportadu, ma is cumputadores prus betzos podent èssere chi siant prus stentosos. Candu faghet, est mègius a agiùnghere unu pagu de memòria RAM e cambiare su discu fissu cun unu a istadu sòlidu (SSD) pro otènnere mègius prestatziones. Si detzidides de sighire impreende Windows 7 e 8 chircade a su mancu de annoare is navigadores web (browser) a is ùrtimas versiones e impreade unu programma antivirus bonu pro unu mègius amparu de su traballu bostru.