Est acabau oi su suportu po Windows 7 e 8

Windows 7 est stètia una versioni de su sistema Microsoft stimada meda de is impitadoris, chi dd'ant biu comenti su sucessori perfetu de Windows XP apustis de su fallimentu de Windows Vista, publicau in pressi e tropu grai po sa parti manna de is computeras chi esistiant insandus. Sa versioni 8 no est stètia amada che sa 7, ma mancu odiada che Vista. Est stètia una versioni de passàgiu in unu perìodu innui Microsoft circàt de si pigai una parti de su mercau in su mundu de is sistemas po dispositivus mòbilis. Teniat duncas su bantaxu de essi lèbiu e lestu in s'aviu. Comentisisiat, in su perìodu de Windows 7 e 8 is cumputadoris bèndius funt stètius medas, duncas s'11% de is elaboradoris acapiaus a s'arretza impreant ancora sa versioni 7 e un'àteru 3,59% impreant is versionis 8 e 8.1. Totu custus impitadoris ant a fai beni a circai un'alternativa, ca is sistemas insoru no ant a arrici prus annoamentus.

Windows 7 est arribau in su mercau in su 2009, Windows 8 in su 2012 e Windows 8.1 in su 2013, duncas seus chistionendi de sistemas de dexi annus a oi o prus, chi si podiant annoai cun su sòlitu trastu Windows Update gràtzias a su programa Extended Security Update. Is annoamentus arràngiant faddinas e amparant su sistema de virus e àterus ameletzus. Funt duncas de importu mannu, pruschetotu oindii ca is computeras funt totu acapiadas a s'arretza innui podint essi atacadas in calisisiat momentu.

Ita tocat a fai duncas?
Sa parti manna de is elaboradoris bèndius intra su 2012 e 2015 (annu de bessida de Windows 10) fait ancora a ddus impreai oindii. Su cunsillu miu est de proai una distributzioni de Linux, comenti po esempru Ubuntu. Po is dispositivus prus antigus ddoi at versionis lèbias comenti Xubuntu e Lubuntu. Chi si serbit Windows amarolla, podeis intentai cun Windows 11 o mancai su 10 chi est ancora suportau, ma is cumputadoris prus bècius podit essi chi siant prus stentosus. Candu fait, est mellus a agiungi unu pagu de memòria RAM e cambiai su discu fissu cun unu a stadu sòlidu (SSD) po otenni mellus prestatzionis. Si decideis de sighi impreendi Windows 7 e 8 circai assumancu de annoai is navigadoris web (browser) a is ùrtimas versionis e impreai unu programa antivirus bonu po unu mellus amparu de su traballu bostu.