Iscoberta debilesa pro is protzessores Intel

Is chircadores de Positive Technologies ant iscobertu una debilesa in is protzessores Intel, chi nde arruinat sa seguresa, permitende de esecutare còdighe malu chi diat a pòdere fàghere dannos a su sistema o nde furare datos segretos. Is protzessores Intel sunt impreados in una parte manna de is elaboradores personales e àteros dispositivos comente a dispositivos de giogu eletrònicu, duncas su perìgulu pertocat una parte manna de is impitadores e de is aziendas.

Positive Technologies, comente si siat, narat chi pro immoi su perìgulu est teòricu isceti, ma non depet èssere pigadu a pagu contu. Intel at decraradu chi giai connoschiat custu problema e est giai traballende pro ddu isòrvere. A dolu mannu, custu non podet èssere isòrvidu a manera cumpleta in is dispositivos chi ddu portant, pro ite ca pertocat còdighe chi est iscritu deretu in is tzircùitos de is protzessores, ma podet isparèssere dae is mollos noos, megiorende·nde su progetu.