Onniasantu 2020

"In totu s'Europa is fortzas de politzia, autoridades locales e aziendas privadas sunt isparghinende a s'iscùsia tecnologias isperimentales e forrogadoras chi sighint, analizant e mudant a ogetos is faches nostras e is corpus nostros cando nos movemus in is logos pùblicos. Custos ùrtimos sunt de difèndere, pro chi in issos is deretos nostros, is libertades nostras e is comunidades nostras siant amparados."
Custa est s'introdutzione a sa petitzione "Torra a ti pigare sa fache" pro pedire de proibire sa guardiania biomètrica, impreada in calicunu logu e pranificada o isperimentada in àteros. Cun custa genia de guardiania is sistemas informàticos podent connòschere is caras de onniunu de nois e registrare is movimentos nostros, mancari sinnalende·ddos a is autoridades cando su sistema ddos classìficat che "atividade assumbrada".

Is eletziones in is Istados Unidos parent fatas, ma Facebook at detzìdidu de blocare pro un'àteru mese totu is annùntzios polìticos e de lassare ativu su Tzentru de Informatzione a pitzus de su votu pro sighire a controllare su contu de is votos, chi est prus longu pro more de su votu postale, chi gente meda at seberadu pro sa dificultade de si mòere de domo in mesu a sa pandemia de Covid-19.

Immuni, s'aplicatzione italiana de annotu de is cuntatos progetada pro cumbàtere s'isparghidura de su Coronavirus Sars-Cov-2, at tentu un'incumintzu istentosu, cun is iscarrigamentos firmos a 4 milliones isceti in su mese de argiolas passadu. Cun sa segunda aundada de impestos custu nùmeru est arribadu a 9,36 milliones su 25 de su mese de ledàmene.

A pustis de s'antitrust americanu, puru s'anti-monopòliu italianu ipotizat un'abusu de sa positzione de domìniu de Google. Su problema custa borta est s'impreu de is datos pro s'elaboratzione de sa publitzidade.
Google est istada acusada de impedumare a is aziendas concurrentes de pònnere elementos de sighidura de sa navigatzione in su web de is usuàrios pro èssere s'ùnica a pòdere regollere custos datos.