Wikinews serrat
Si nd'est arresonadu a tempos largos, ma a sa fine sa detzisione dd'ant leada e annuntziada de manera ufitziale: Wikinews (o Wikinoas) serrat.
Martzu 2026
Bos oferimus torra su CROS in lìnia
Comente ischit bene chie totu iscriet in sardu, sa RAS nd'at bogadu unos cantos trastos de importu chi teniat in lìnia, comente su ditzionàriu de Màriu Puddu e su CROS (Curretore Regionale Ortogràficu Sardu), chi sa domo editora NOR at torradu a pustis a pònnere in lìnia - e ddi torramus gràtzias pro custu. A dolu mannu, su CROS no funtzionat prus bene e tenet fintzas su problema chi est cosa betza chi andat male cun dispositivos mòbiles. Gràtzias a su fatu chi su CROS est a disponimentu cun lissèntzia lìbera, su grupu de Sardware at propostu de isvilupare unu curretore nou de pònnere a disponimentu in lìnia, mi nde so incarrigadu de persone e ddu pòngio cun praghere a disponimentu de totus.
Chat Control at pèrdidu in su Parlamentu Europeu
S'11 de martzu de su 2026 su Parlamentu Europeu at aprovadu un'emendamentu de importu a sa lege chi diat àere permìtidu s'averìguu pro mèdiu de algoritmos de inteligèntzia artifitziale de is arresonos privados in is aplicatziones de messageria. Custa lege, connota comente Chat Control, diat sinnificare sa fine de sa riservadesa e sa possibilidade de finire imbistigados dae sa giustìtzia pro una faddina de s'IA.