Bos oferimus torra su CROS in lìnia

https://www.sardumatica.net/ainas/cnesc/

Comente ischit bene chie totu iscriet in sardu, sa RAS nd'at bogadu unos cantos trastos de importu chi teniat in lìnia, comente su ditzionàriu de Màriu Puddu e su CROS (Curretore Regionale Ortogràficu Sardu), chi sa domo editora NOR at torradu a pustis a pònnere in lìnia - e ddi torramus gràtzias pro custu. A dolu mannu, su CROS non funtzionat prus bene e tenet fintzas su problema chi est cosa betza chi andat male cun dispositivos mòbiles.

Gràtzias a su fatu chi su CROS est a disponimentu cun lissèntzia lìbera, su grupu de Sardware at propostu de isvilupare unu curretore nou de pònnere in lìnia, mi nde so incarrigadu de persone e ddu pùblico de manera chi totus ddu potzant impreare. Si tratat de sa versione LSC de su curretore: sa versione de is variedades non s'agatat prus in logu perunu, sinuncas diat fàghere a pònnere ambas duas a disponimentu.

A su curretore, leende ispiratzione dae su progetu GNU, dd'apo postu CNESC (CNESC No Est Su CROS) a nòmine de traballu. Dd'agatades inoghe e podides leare parte a sa proa beta, sinnalende·mi (fintzas comente cummentu a custu artìculu) faddinas, ideas, cussìgios, etc. Una borta chi funtzionat bene, dd'amus a pònnere fintzas in su situ web de Sardware e su còdighe de orìgine at a èssere lìberu etotu.

Ispassiade·bos!