Serrant Wired Italia e Tiscali Notizie puru

Sighint a serrai situs de noas, apustis de Wikinews. Custa borta tocat a Wired Italia, redatzioni italiana de sa revista spetzializada in tecnologia, e a una connoscèntzia bècia de is sardus: Tiscali Notizie.

S'annùntziu chi pertocat Wired est arribau su 16 de abili de ocannu e comenti a arraxoni s'arramonant is pagus ligidoris e s'arribu de s'IA chi sèmpiri prus genti impreat po circai informatzionis. Calincunu in su web nd'at biu s'ironia, sendi chi Wired est nàscia po contai fenòmenus che s'IA etotu, ma si tratat de una pèrdida po chini totu circàt noas cunfiàbilis in contu de tecnològia e totu su chi ddas ingiriàt. In prus, si serrant is situs chi fait a si-ndi fidai, mancu s'IA at a tenni prus logus de innui ndi bogai informatzionis afidàbilis, fadendi-sì pagu profetosa. Po imoi, at a abarrai sa versioni in inglesu de Wired, oi de seguru prus fàcili de consultai chi no in su 2009 gràtzias a is tradutoris automàticus integraus me is navigadoris web, ma de seguru prus cuncentrada in su chi acuntessit me is Stadus Aunius chi no in Europa.

Po cantu pertocat Tiscali Notizie, s'aventura sua est finida cun su mesi de abrili de ocannu, comenti iat annuntziau sa redatzioni etotu chena spricai meda in contu de custa decisioni, ma si podit imaginai chi innoi puru siat un'ammisturu de cuncorrèntzia e spainadura e s'IA. In beridadi, si bidiat giai de diora chi Tiscali Notizie no fiat in sa mellus forma sua, sendi chi fiat fàcili a agatai faddinas me is noas e chi unus cantu tìtulus fadiant pensai a sa strategia de s'aciapa-clic.
Tiscali Notizie esistiat de su 2000, candu Tiscali boliat portai a s'Itàlia su chi giai fadiant Yahoo! e MSN in Amèrica cun is portalis insoru. Insandus teniat fintzas unu motori de circa suu, Janas, cambiau apustis cun Google e apustis ancora cun un'àteru progetu suu, Istella, chi a dolu mannu ant apustis abandonau. Su web in s'interis est cambiau meda, difatis ocannu Tiscali at serrau fintzas su servìtziu de spàtziu web, cun sa voluntadi, forsis, de si cuncentrai sceti in s'oferta sua telefònica e de frunidori de acessu a Internet.