Tiscali serrat Webspace

Bos dd'apo contadu in s'artìculu dedicadu a Neocities: su web de fine annos 1990 e primos annos 2000 fiat diferente meda de su de oe e totus boliant dare unu contributu a dd'ammanniare aberende unu situ pro faeddare de interessos e passiones. Pro ddu permìtere, is frunidores de atzessu a Internet donaiant a is abbonados unu pagu de logu pro carrigare is pàginas issoro: s'ispàtziu web. Tiscali fiat tra custos e sunt istètias medas is persones chi nd'ant aprofitadu. Acontesset ancora oe difatis de agatare sitos web.tiscali.it faeddende de onni argumentu in sa chirca in Google e àteros motores.

Totu custu at a ispatzare tra pagas dies. Tiscali at difatis ghetadu su bandu cun unu messàgiu chi cumparit in onni situ carrigadu in s'ispàtziu suo chi su servìtziu at a èssere serradu su 01/02/2026.

Est un'àteru sinnu chi is cosas sunt cambiadas meda cun su tempus e sighit su caminu chi ant pigadu àteros servìtzios comente Fortunecity, Xoom.it, GeoCities e 000webhost. Oe su prus de su cuntènnidu de Internet est fatu de messàgios curtzos, vìdeos e fotografias fatas cun su telefoneddu, sa comunicatzione lestra e iscarèssida pagos minutos a pustis de dd'àere lèghida, is pregontas si faghent a s'IA e is sitos web parent cosa betza, che is telèfonos pùblicos. Is pagos chi tenent ancora gana de iscrìere, difatis, s'afidant a sa fòrmula de su blog (o diàriu) cun programmas comente Wordpress chi permitint de publicare a sa lestra e chene connoschimentos tècnicos.

Pro chie tenet ancora unu situ web, comente si siat, ddoe est ancora tempus de passare a un'alternativa. Custas sunt is prus realìsticas:

• Mòere su situ a NeoCities;
• Impreare un'àteru servìtziu a in donu, comente InfinityFree;
• Impreare Wordpress;
• Pagare unu servìtziu de hosting cumpletu, comente Aruba o Keliweb o Tophost;

So seguru però, a dolu mannu, chi medas de is sitos acasagiados in Tiscali siant oramai abbandonados, duncas tra deghe dies at a isparèssere unu biculeddu de su web chi forsis no at a torrare prus.