NeoCities: su web fatu a manu bivit ancora

Pro cumprèndere ite est NeoCities tocat a torrare una pariga de minutus a su web de is annos '90 e is primos 2000. Is giassos ddos iscriìamus a manu in HTML o cun s'agiudu de un'editore visuale comente Microsoft FrontPage o Namo WebEditor. Non ddoe fiant is retzas sotziales: a su sòlitu si comunicaiat cun is àteros impitadores pro mèdiu de chat o forum, chi is prus pagu espertos podiant agiùnghere a su situ gràtzias a ainas de servìtzios esternos. Is giassos fiant istàticos: nudda de cummentos, nudda de votos, perunu arrepicu a foras de is GIF animadas; fiant fatos pro ispainare connoschimentu, non pro ispassiare (isceti).

In generale, su de si fàghere su giassu web fiat unu grandu obietivu: totus nde boliant unu pro faeddare de is interessos pròpios. Is cumpangias telefònicas difatis oferiant semper cun s'abonamentu fintzas s'ispàtziu web de impreare a custu iscopu. Custu est andadu a in antis finas a sa difusione de is diàrios (blog) in antis e de is retzas sotziales a pustis.

Oe su web est in declinu, fatu isceti de post efìmeros e cosas a comporare.
Ddoe at unu bisòngiu mannu de torrare a pònnere connoschimentos a disponimentu pro fraigare cudda biblioteca mundiale manna chi oe est morende·si. Custa est sa punna de NeoCities.

Neocities est una prataforma de hosting a in donu pro giassos web istàticos chi cunsentit a is impitadores de creare e publicare càbidos online impreende HTML, CSS e JavaScript. Non faghent bisòngiu cumpetèntzias mannas de programatzione, de manera chi fintzas is printzipiantes podent creare unu situ web. S'interfache includet un'editore HTML integradu in su navigadore, unu sistema de gestione simpre de documentos, agiudu pro dòminos personalitzados, feed RSS e trastos a riga de cumandu. No acasàgiat publitzidade e promovet s'autonomia creativa prena, oferende unu logu sena vìnculos cummertziales pro sa publicatzione de progetos personales, portfolio, blog o esperimentos gràficos.

Su design e sa filosofia de Neocities ammentant in manera crara s'era de is giassos personales de is primos annos 2000, comente is chi si publicaiant in GeoCities, prataforma famada annos a oe ma oramai defunta. Is piessìnnios suos sunt is layout simpres, sa gràfica personalitzada e s'ènfasi in s'espressione individuale. Custu acostamentu sotziale, unidu a sa totale libertade creativa, contribuit a torrare a istantargiare un'ecosistema web detzentralizadu e partetzipativu, in cuntrastu cun is dinàmicas de is prataformas tzentralizadas modernas, cun moderatzione e tzensura fortes meda.

Pro cumintzare cun Neocities bastat a si registrare a in donu in su situ ufitziale. Una borta creadu su profilu, intramus in una dashboard chi ammustrat is noas de is sitos chi sighimus e oferit unu butone pro modificare s'ispàtziu nostru. S'editore integradu cunsentit de carrigare documentos, iscrìere còdighe HTML deretu in su navigadore e organizare s'istrutura de su giassu comente a una cartella istàtica. Is prus pagos espertos podent incumintzare copiende e modifichende template chi esistint, sighende ghias pensadas pro printzipiantes, o impreende un'editore visuale esternu (comente BlueGriffon, su Composer de Mozilla SeaMonkey, Amaya, WYSIWYG HTML Editor e medas àteros) e carrigare a pustis is documentos in NeoCities.

Is chi tenent esigèntzias prus mannas podent agiùnghere cumponentes esternos comente contadores de bìsitas, chat, forum, guestbook e àteru impreende servìtzios comente Bravenet, WebsiteOut, Counter12, CBox, 123guestbook e meda àteros. Est fintzas possìbile a ammaniare unu forum in servìtzios comente FreeForumZone o ForumFree e nde pònnere s'acàpiu in su giassu. Non bos depides abetare una truma manna de iscritos comente in is primos annos 2000, ma abarrade tzertos chi chitzo o tardu calicunu at a fàghere bìsita pro postare pregontas e impressiones e mancari s'at a creare fintzas una comunidadedda unida. Pro los mantènnere bios e non dare un'idea de abbandonu, diais pòdere abèrrere carchi discussione boisàteros matessi cando non cando.
Cussìgio in fines de creare un'indiritzu curtzu pro su giassu impreende unu servìtziu de rediretzione a in donu comente dot.tk.

Neocities favoresset s'interatzione sotziale a traessu de profilos pùblicos, feed de noas, tag temàticos e sa possibilidade de sighire àteros creadores. Cada giassu podet èssere esploradu, cummentadu e cumpartzidu, favorende sa nàschida de micro-comunidades a inghìriu de interessos comunos. Esistent fintzas logos esternos comente subreddit, forum e blog dedicados, in ue is impitadores s'iscàmbiant cussìgios, layout e trastos.

Concruende, NeoCities est una comunidade cun unu gustu retrò in ue ais a pòdere torrare a iscobèrrere su web beru, siat comente a ispetadores siat comente a protagonistas e cumpartzire sos connoschimentos bostros, a manera bostra, sena postadas chi siant iscarèssidas a pustis de 10 minutos, sena sa tzensura de Meta, ma semper a manera fàtzile, intuitiva, e comente a parte de una comunidade, si bolides.

Faghide·mi ischire si detzidides de nche proare e/o si bos faghet bisòngiu unu pagu de agiudu.