Su Rennu Auniu ponit a Alan Turing asuba a is 50£

Sa Banca de Inghilterra at publicau su progetu po su billetu nou de banca de 50£, chi at a tenni sa màgini de Alan Turing, unu matemàticu de importu mannu e unu de is babus de s'informàtica. Su personàgiu dd'ant sceberau in su 2019 po arregordai su traballu suu me is campus de sa matemàtica e s'informàtica e po su contributu suu in sa vitòria in sa Segunda Gherra Mundiali po ai decifrau su còdixi Enigma de sa Germània.

Turing at formalisau su cuncetu de algoritmu e progetau sa màchina chi portat su nòmini suu e chi est sa base teòrica po is elaboradoris modernus. Po custa arrexoni ddu cunsideraus unu de is babus de s'informàtica e de s'intelligèntzia artificiali.

Su sceberu de Turing, in prus de ndi celebrai su traballu e is arresurtau sientìficus, est su connoscimentu de su dannu chi su guvernu dd'at fatu. Difatis, custu traballu no est abastau a ddi evitai unu processu e una cundanna po sa omosessualidadi sua, chi dd'at portau a si bociri in su 1954. At arriciu una decraratzioni de scusa sceti in su 2009 e sa gràtzia de sa Reina in su 2013.

Màgini de sa Wikipedia.