Agiudai sa circa asuba a su Coronavirus chena sfortzus
Totus, in una manera o in s'atra, seus contribuendi a gherrai contra custa pandèmia, chini ocupendi-si de is mobàdius, chini donendi calincunu soddu a su prontu sucursu e chini abarrendi in domu po evitai casus nous. Creu chi in medas de nosu, cumenti chi siat, abarrit sa gana de fai de prus e si potzu proponi una manera chi non s'at a esponni a perunu arriscu e a peruna pelea.
Eis mai intèndiu fueddai de càrculu distribuiu? In pràtica, ddoi at progetus de circa chi arrechedint una cantidadi manna de càrculus matemàticus, duncas de potèntzia manna e iant a serbiri elaboradoris gastosus meda po ddus fai. Sa mellus solutzioni po cumpriri custus càrculus est cudda de ddus truncai in unidadis minoris e ddas esecutai me is elaboradoris de millionis de voluntàrius spraxus po su mundu. Su progetu Rosetta@home at decrarau chi su traballu suu, e insandus su contributu de is voluntàrius suus, est agiudendi sa circa asuba a su Coronavirus. Nosu puru podeus contribuiri ponendi a disponimentu is elaboradoris, tauleddas e telefoneddus nostus.
Bideus passu-passu cumenti fai.
- Scarrigai e installai BOINC. Is impitadoris Linux ddu podint agatai cun su pròpiu manigiadori de pachetus e is impitadoris Android in su Play Store. BOINC est sa prataforma de s'Universidadi de Berkeley chi vàrius progetus de càrculu distribuiu podint impreai cumenti basi.
- Aberrei BOINC Manager. Po primu, si pedit de arratzai unu progetu po contribuiri. Sceberai Rosetta@home.
- Si pedit de fai s'acessu a su contu bostu de BOINC o de ndi creai unu nou. At a bastai a indicai un'indiritzu de posta eletrònica e una crai.
- Candu eis fatu s'acessu, su programma at a fai totu a solu: at a scarrigai is unidadis de traballu, at a fai is càrculus in is momentus de impreu minori de su dispositivu e at a imbiai is arresurtaus a su serbidori candu at finiu. Dònnia borta chi su programma imbiat is datus, s'arricint crèntias. Custas non tenint un'usu pràticu, ma sceti che a arreconnoscimentu de su pròpiu contributu.
Chi teneis s'impressioni chi BOINC carcat tropu s'aparatu bostu (po esempru chi si callentat, sa bentiera fait carraxu o s'impreu de sa memòria s'àrtziat tropu) est possìbili a aberri is sceberus e redusi su tempus de CPU e sa percentuali de memòria impreaus fintzas candu no agatais is valoris primorosus. Non bollu chistionai tropu de custas minudas, ma si teneis problemas, intendei-si lìberus de mi scriri e apa a circai de s'agiudai.
Cumenta