Màginis PNG impreadas po furai datus

Is circadoris de Avast, su produtori de unu de is prus antivirus famaus de su mundu, ant publicau un'articulu de interessu apitzus de una tènnica impreada po furai datus a asiendas de importu e de guvernu in Àsia. Sa cosa de interessu est chi su còdixi po ndi-ddus furai est cuau in màginis PNG che millionis de àteras chi s'agatant in Ìnternet.

Is possibilidadis de cuai informatzionis (bonas o malas) in màginis o àterus archìvius funt diferentis. Eus giai atopau un'ameletzu chi si depiat a una debilesa de buffer overflow e est in teoria possìbili chi si potzant progetai màginis po sfrutai una debilesa che custa.

Custa borta sa tènnica impreada est diferenti: si càrrigat in su computadori de sa vìtima unu programa chi decodìficat un'archìviu PNG chi parit una màgini che àteras ma cuat unu programa chi furat datus de s'impitadori. No si sciit ancora beni comenti su programa de s'incumentzu potzat essi carrigau in s'obietivu de s'atacu, ma si creit chi potzat essi fatu sfrutendi una debilesa de su sistema.

Si tratat duncas de un'atacu fini, difìcili de scoviai e po custu perigulosu meda. Seguru, imoi chi est stètiu identificau is programas antivirus ant a arrannesci a ddu blocai innantis chi fatzat àteru dannu. Sa noa bona est chi s'atacu est progetau po su sistema Windows e duncas no tocat a is impitadoris de Linux e Mac.

Po ndi sciri de prus, lìgi s'artìculu originali.