Pìndulas: sa memòria

Sa memòria est unu de is cumponentes de fundamentu de unu cale si siat elaboradore, segundu is definitziones de Turing e Von Neumann. Fintzas cando non si nd'acatamus, semus impreende calicunu tipu de memòria, fintzas in is mini-carculadores de butzaca. Difatis, su carculadore depet regordare a su mancu is datos de intrada pro pòdere fàghere un'operatzione e sa cantidade de datos de regordare creschet cun sa cumplessidade de is càrculos e fintzas de s'interfàtzia de impreu.
Ddoe at medas tipos de memòria e podent èssere classificadas in maneras diferentes segundu s'impreu e is caraterìsticas tècnicas. Inoghe bidimus is prus de importu.

Sa memòria chi connoschimus mègius est sa memòria a atzessu casuale, connota puru comente a RAM (dae s'inglesu Random Access Memory). Custu nùmene faghet riferimentu a sa manera de s'elaboradore de atzedere a is datos chi chircat e sa lestresa de custa operatzione.
Sa memòria est organizada in tzellas, de sòlitu de 1 byte (8 bit, duncas 8 tzifras binàrias) onniuna. Duncas sa tzella est s'unidade prus pitica chi sa memòria podet ammentare e cada tzella tenet s'indiritzu suo. S'elaboradore podet lèghere o iscrìere cale si siat tzella in cale si siat secuèntzia cun su matessi tempus de atzessu, a s'imbesse de una memòria a atzessu secuentziale (comente su nastru magnèticu), in ue pro lèghere s'ùrtimu byte tocat a cùrrere totu su suportu o de is memòrias a atzessu diretu comente a unu discu magnèticu o unu discu òticu chi depent èssere lèghidos pro mèdiu de aparatos mecànicos chi si depent mòere dae una parte a s'àtera.

Andamus a bìdere immoi comente custos tipos de memòria sunt impreados.
Is elaboradores tìpicos tenent bisòngiu de prus tipos de memòria: primària, segundària e memòrias esternas de massa.

Sa memòria primària est sa prus de importu, ca permitit a s'unidade tzentrale de càrculu (CPU) de lèghere is istrutziones e is datos de intrada e nche iscrìere is resurtados de su càrculu. Custa memòria est de sòlitu una memòria a atzessu casuale de tipu volàtile: bolet nàrrere chi cando s'elaboradore est istudadu, sa memòria perdet totu su cuntènnidu.
Sa memòria segundària (o memòria de massa) est sa chi impreamus pro ammentare (o sarvare) is programmas e is datos nostros. Pro custa funtzione s'impreant memòrias non-volàtiles (permanentes) comente a su discu fissu o s'unidade a istadu sòlidu (SSD). Sende chi s'organizatzione in tzellas chi amus bidu diat èssere pagu còmoda de impreare pro s'usuàriu, custas memòrias sunt organizadas dae is programmas (prus che totu dae su sistema operativu) cun unu sistema de archìvios (connotos puru comente a documentos o file).
A ùrtimu, is memòrias esternas de massa sunt is chi impreamus pro fàghere una còpia de is datos prus de importu e de sòlitu sunt prus pagu lestras ma ddoe podent càbere meda prus datos chi no in sa memòria primària o segundària. Esempros sunt is discos fissos esternos, is craes USB, memòrias SD, CD, DVD, BluRay e is nastros magnèticos DAT.

Is prus atentos si nd'ant a èssere acatados chi no amus classificadu is memòrias a istadu sòlidu nen comente a memòrias a atzessu casuale nen comente a memòrias a atzessu diretu. Una memòria a istadu sòlidu, comente narat su nùmene, est fata de tzircùitos integrados eletrònicos e duncas su tempus de atzessu a una cale si siat tzella de memòria est semper su pròpiu. Sa classificatzione giusta duncas diat a èssere memòrias a atzessu casuale non-volàtiles ma oe in die "memòria a atzessu casuale" e "RAM" sunt impreados pro chistionare de sa memòria volàtile e primària de s'elaboradore. Esempros de memòrias a istadu sòlidu sunt is unidades SSD, is memòrias SD e is craes USB.

In un'impreu tìpicu de s'elaboradore, ddoe at una fase de aviu, in ue is programmas sunt copiados dae sa memòria segundària (prus manna) a sa primària (prus lestra). A pustis, s'usuàriu faghet su traballu suo e ddu sarvat in sa memòria segundària e/o in una memòria esterna. Cando s'elaboradore est istudadu, sa memòria primària perdet totu su chi ddoe fiat, ma sa segundària arreguat totu su chi s'usuàriu at detzìdidu de nche lassare.

Is prus curiosos podent sighire a leghere pro bìdere un'esempru de impreu de memòria primària e segundària in unu programma simpre meda in linguàgiu C.

Impreu de sa memòria in programmatzione

Sighit custu esempru iscritu in linguàgiu C de programma chi impreat sa memòria primària pro ammentare unu datu insertadu dae s'usuàriu e a pustis ddu sarvat in un'archìviu in memòria de massa.

int main () {
    /* Custa istrutzione narat a su sistema
       de riservare una o prus tzellas de memòria primària
       pro nche pònnere unu nùmeru intreu.
       Naramus a sa tzella de memòria cun su
       nùmene suo una "variàbile". Cando impreamus
       sa variàbile, su sistema bortat a manera
       automàtica su nùmene in un'indiritzu numèricu */
    int datu;

    /* Pedit a s'usuàriu de insertare unu nùmeru e ddu
       iscriet in sa variàbile datu. S'usuàriu at a iscrìere
       su nùmeru cun su sistema detzimale e su sistema ddu
       bortat a manera automàtica in còdighe binàriu pro ddu
       pòdere ammentare in memòria */
    scanf("%d", &datu);

    /* Torrat a iscrìere in s'ischermu
       su nùmeru chi s'usuàriu aiat isertadu */
    scanf("Custu est su nùmeru chi as iscritu: %d", datu);

    /* Crea un'archìviu in sa memòria segundària
       cun su nùmene "numeru"
       e dd'aberit in modalidade de iscritura */
    FILE *arch = fopen("numeru", "w")

    /* Iscriet su nùmeru chi s'usuàriu aiat insertadu
       in s'archìviu */
    fprintf(arch, "%d", datu);

    /* Serrat s'archìviu */
    fclose(arch)

}

Pràghida sa pìndula de informàtica? Lassa·mi unu cummenteddu inoghe a fatu e cumbida is amigos a dda lèghere.
E si tenes pregontas o boles cussigiare un'àteru argumentu, iscrie·mi.
A sa pròssima.