Serrant Wired Italia e Tiscali Notizie puru

Sighint a serrare sitos de noas, a pustis de Wikinews. Custa borta tocat a Wired Italia, redatzione italiana de sa revista spetzializada in tecnologia, e a una connoschèntzia betza de is sardos: Tiscali Notizie.

S'annùntziu chi pertocat Wired est arribadu su 16 de arbile de ocannu e comente a arresone s'si remonant is pagos leghidores e s'arribu de s'IA chi semper prus gente impreat pro chircare informatziones. Calicunu in su web nd'at bidu s'ironia, sende chi Wired est nàschida pro contare fenòmenos che s'IA etotu, ma si tratat de una pèrdida pro chie totu chircaiat noas cunfiàbiles in contu de tecnològia e totu su chi ddas inghiriaiat. In prus, si serrant is sitos chi faghet a si nde fidare, mancu s'IA at a tènnere prus logos dae in ue nde bogare informatziones afidàbiles, faghende·si pagu profetosa. Pro immoe, at a abarrare sa versione in inglesu de Wired, oe de seguru prus fàtzile de consultare chi no in su 2009 gràtzias a is tradutores automàticos integrados me is navigadores web, ma de seguru prus cuntzentrada in su chi acontesset me is Istados Unidos chi no in Europa.

Pro cantu pertocat Tiscali Notizie, s'aventura sua est finida cun su mese de abrile de ocannu, comente aiat annuntziadu sa redatzione etotu chene ispricare meda in contu de custa detzisione, ma si podet immaginare chi inoghe puru siat un'ammisturu de concurrèntzia e ispainadura e s'IA. In beridade, si bidiat giai dae ora chi Tiscali Notizie non fiat in sa mègius forma sua, sende chi fiat fàtzile a agatare faddinas me is noas e chi unos cantos tìtulos faghiant pensare a s'istrategia de s'atzapa-clic.
Tiscali Notizie esistiat dae su 2000, cando Tiscali boliat portare a s'Itàlia su chi giai fadiant Yahoo! e MSN in Amèrica cun is portales issoro. Insandus teniat fintzas unu motore de chirca suo, Janas, cambiadu a pustis cun Google e a pustis ancora cun un'àteru progetu suo, Istella, chi a dolu mannu ant a pustis abbandonadu. Su web in s'ìnteri est cambiadu meda, difatis ocannu Tiscali at serradu fintzas su servìtziu de ispàtziu web, cun sa voluntade, forsis, de si cuntzentrare isceti in s'oferta telefònica e de atzessu a Internet.