Su progetu seti@home at a èssere ibernadu

Seti@home est su càrculu distribuidu pro s'elaboratzione de is datos chi benent de su progetu SETI (Search for Extraterrestrial Intelligence, Chirca de abbistesa extraterrestre). Esistit de prus de 20 annos e prus de 5,2 milliones de persones ant aderidu, ponende a disponimentu una parte de sa capatzidade de càrculu de is elaboradores issoro.

S'Universidade de Berkeley at annuntziadu chi no at a imbiare prus datos de elaborare a incumentzare dae su 31 de martzu 2020. Is arresones pro custa detzisione sunt:

1. Totu is datos chi serbint pro immoi sunt istados analizados.
2. Manigiare su càrculu distribuidu est unu traballu mannu e sa prioridade immoi est s'anàlisi de is datos torrados dae s'elaboratzione.

Su progetu est isceti ibernadu pro su momentu, ma no est mortu. In prus, sa prataforma impreada pro s'elaboratzione automàtica de is datos, BOINC, podet èssere impreada pro àteros progetos e is impitadores sunt cumbidados a ddu fàghere, ca nche nd'at de importu mannu.