Mypal: navigadore pro Windows XP

Mypal: navigadore pro Windows XP

Mypal in Windows XP

Windows XP est istètidu unu de is prus sistemas vidanos de Microsoft: publicadu in su 2001, su suportu ufitziale est duradu fintzas a su 2014, cun unu annoamentu ispetziale in su 2017. Est coladu tempus meda, est berus, e in s'ìnteri Microsoft at publicadu Windows Vista, 7, 8, 8.1, 10 e 11, ma me is annos de Windows XP gente meda at pigadu unu o prus elaboradores pro domo e gente meda at preferidu a sighire impreende XP fintzas me is annos de Vista, ca cussu fiat unu sistema resèssidu mala. Totu custos elaboradores podent ancora èssere impreados, prus che totu dae cuddos impitadores chi non tenent bisòngiu de potèntzia manna de càrculu. Is sistemas operativos noos però sunt tropu graes pro ddoe funtzionare. Intre is solutziones possìbiles, ddoe at installare unu sistema lèbiu, comente una distributzione de Linux pro elaboradores betzos o chircare programmas chi sigant funtzionende in XP. Su navigadore Mypal est unu de cussos.

Mypal est un'adatamentu pro Windows XP de PaleMoon. PaleMoon est unu navigadore basadu a pitzus de còdighe de Mozilla, lèbiu e istàbile chi, però, che sa parte manna de is navigadores de oe, bolet a su mancu Windows 7 o unu prus nou.


A su contràriu de Firefox, chi podet funtzionare in Windows XP fintzas a sa versione 52.9.0 isceti, Mypal sighit retzende annoamentos de seguridade e de funtzionalidade pro ddu pònnere in die cun is ùrtimos standard impreados in su web. De seguru est una noa bella pro is chi bolent impreare elaboradores betzos chene ddis cambiare su sistema cun un'àteru chi no connoschent bene. Difatis me is ùrtimos annos s'evolutzione de su web at incumentzadu a èssere semper prus lestra e navigadores de una pariga de annos a oe funt giai tropu betzos - podides fàghere una proa si tenides unu telefoneddu o una tauledda de su 2013/2014.

Un'informatzione de interessu pro is chi ant detzìdidu de proare fintzas ReactOS, est chi MyPal funtionat in cue puru e dd'agatant in su manigiadore de is pachetes.

Cummenta