Chat Control at pèrdidu in su Parlamentu Europeu

S'11 de martzu de su 2026 su Parlamentu Europeu at aprovadu un'emendamentu de importu a sa lege chi diat àere permìtidu s'averìguu pro mèdiu de algoritmos de inteligèntzia artifitziale de is arresonos privados in is aplicatziones de messageria. Custa lege, connota comente Chat Control, diat sinnificare sa fine de sa riservadesa e sa possibilidade de finire imbistigados dae sa giustìtzia pro una faddina de s'IA.

S'emendamentu, bòlidu dae Markéta Gregorová (grupu Greens/EFA), permitit s'averìguu de is messàgios isceti a intro de imbìstigos pretzisos e isceti si autorizadu dae s'autoridade giuditziària, duncas blocat sa possibilidade chi totu is arresonos nostros siant averiguados in cale si siat momentu.

Custu emendamentu, comente si siat, NO est sa fine de sa proposta, chi at a sighire a èssere batalliada e chi podet essere ancora cambiada e torrada a presentare, duncas non nos nche podimus abarrare trancuillos de su totu.

Regordamus chi si seis contràrios a sa proposta podides bisitare su situ Fight Chat Control e sighire is noas de EDRi, giai connota pro sa batalla sua contras sa guardiania biomètrica.