Meta torrat a impreare is datos tuos pro s'IA sua

Meta at giai proadu a impreare is datos de is impitadores pro s'annestru de s'Inteligèntzia Artifitziale sua, e immoe est torrende a comunicare a is iscritos a Facebook e Instagram chi at a fàghere su pròpiu. Pro chie custa cosa non ddi praghet, ddoe est sa possibilidade de refudare su cunsensu e NO est sa de dd'iscrìere in sa bacheca de Facebook comente calicunu, a su sòlitu, est faghende.

Is avisos sunt arribende a traessu de is notìficas a intro de su situ e via posta eletrònica.
Su messàgiu includit unu ligòngiu chi narat chi tenides su deretu de oponimentu. Faghende clic asuba a cussu ligòngiu at a cumpàrrere unu formulàriu pro pedire de s'opònnere a s'impreu de is datos.

Bastat custu e amus a bìdere una cunfirma.