Apertium podet tradùere dae su sardu a s'italianu

Finas a pagos meses a oe su sardu fiat che unu còdighe chi cumprendìamus isceti nois chi dd'amus imparadu in famìlia. Ddoe fiat sa possibilidade de furriare s'italianu in sardu e custu agiudaiat a creare pàginas de Wikipedia prus a sa lestra e faghiat fàghere is peus figuras a cuddos polìticos sardos chi si boliant fàghere bellos cun s'amparu de sa lìngua ma non si istorbaiant a dda imparare comente si tocat. Pro furriare dae su sardu a un'àtera lìngua però nche boliat amarolla una persone bona a faeddare ambas lìnguas.

In custu artìculu e in su chi benit amus a bìdere chi custu faghet a ddu fàghere puru in automàticu e amus a castiare ite paret su resurtadu.

In su mese de ledàmene, a Apertium, tradutore automàticu famadu pro pòdere furriare testu dae su sardu a s'italianu, dd'ant agiuntu sa possibilidade de fàghere s'imbesse.
A primu, est pretzisu a nàrrere chi faghet praghere a ischìere chi Apertium non siat che sa parte manna de is progetos chi pertocant su sardu, est a nàrrere fatos e iscarèssidos. Cale si siat progetu de isvilupu e mantenidura de unu software bolet traballu mannu e faghimus  is cumplimentos a s'iscuadra chi est lòmpida a custu puntu.

Andamus a ddu proare!
Apo pigadu unu de is artìculos de custu situ e fatu còpia-incolla in su situ de Apertium.
Comente podimus bìdere in sa màgine, su resurtadu est bonu. A foras de unos cantu faeddos furriados in manera pagu pretzisa o lassados in sardu, sa tradutzione si cumprendet bene e bolet isceti arrangiada unu pagu pro pàrrere unu resonu naturale in italianu, ma tocat a nàrrere puru chi custu traballu bolet fatu fintzas cun is mègius tradutores, che DeepL, ca est difìtzile meda chi unu trastu automàticu sonet che sa lìngua faeddada ònnia die.

Apo proadu, pro curiosidade, a furriare ambas versiones de s'artìculu: sa in LSC e sa campidanesa (Arrègulas). Su tradutore funtzionat isceti cun sa versione LSC, ca est sa norma chi s'iscuadra de isvilupu at seberadu de impreare, sèberu comunu a progetos medas, mancari no a totus. Amus a bìdere prus a in antis si trastos chi impreant s'IA resessent a impreare àteras propostas de normas puru.