Apertium podit tradusi de su sardu a s'italianu

Finas a pagus mesis a oi su sardu fiat che unu còdixi chi cumprendiaus sceti nosu chi dd'eus imparau in famìlia. Ddoi fiat sa possibilidadi de furriai s'italianu in sardu e custu agiudàt a creai pàginas de Wikipedia prus a sa lesta e fadiat fai is peus figuras a cuddus polìticus sardus chi si boliant fai bellus cun s'amparu de sa lìngua ma no si storbànt a dda imparai comenti si tocat. Po furriai de su sardu a un'àtera lìngua perou nci boliat amarolla una persona bona a fueddai ambas lìnguas.

In custu artìculu e in su chi benit eus a biri chi custu fait a ddu fai puru in automàticu e eus a castiai ita parit s'arresurtau.

In su mesi de ladàmini, a Apertium, tradutori automàticu famau po podi furriai testu de su sardu a s'italianu, dd'ant agiuntu sa possibilidadi de fai s'imbessi.
A primu, est pretzisu a nai chi fait prexeri a sciri chi Apertium no siat che sa parti manna de is progetus chi pertocant su sardu, est a nai fatus e scarèscius. Calisisiat progetu de svilupu e mantenidura de unu software bolit traballu mannu e faeus is cumplimentus a sa scuadra chi est lòmpia a custu puntu.

Andaus a ddu proai!
Apu pigau unu de is artìculus de custu situ e fatu còpia-incolla in su situ de Apertium.
Comenti podeus biri in sa màgini, s'arresurtau est bonu. A foras de unus cantu fueddus furriaus in manera pagu pretzisa o lassaus in sardu, sa tradutzioni si cumprendit beni e bolit sceti arrangiada unu pagu po parri un'arraxonu naturali in italianu, ma tocat a nai puru chi custu traballu bolit fatu fintzas cun is mellus tradutoris, che DeepL, ca est difìcili meda chi unu trastu automàticu sonit che sa lìngua fueddada dònnia dii.

Apu proau, po curiosidadi, a furriai ambas versionis de s'artìculu: sa in LSC e sa campidanesa (Arrègulas). Su tradutori funtzionat sceti cun sa versioni LSC, ca est sa norma chi sa scuadra de svilupu at sceberau de impreai, sceberu comunu a progetus medas, mancai no a totus. Eus a biri prus ainnantis si trastus chi impreant s'IA arrannescint a impreai àteras propostas de normas puru.