Sa petitzioni contras a sa guardiania biomètrica

"In totu s'Europa is fortzas de politzia, autoridadis localis e asiendas privadas funt spraxendi a scusi tecnologias sperimentalis e forrogadoras chi sighint, analisant e mudant a ogetus is facis nostas e is corpus nostus candu nosi moveus in is logus pùblicus. Custus ùrtimus funt de difendi, po chi in issus is deretus nostus, is libertadis nostas e is comunidadis nostas siant amparaus."
Custa est s'introdutzioni a sa petitzioni "Torra a ti pigai sa faci" po pediri de proibiri sa guardiania biomètrica, impreada in calincunu logu e pranificada o sperimentada in àterus. Cun custa genia de guardiania is sistemas informàticus podint connosci is caras de donniunu de nosu e arregistrai is movimentus nostus, mancai sinnalendi-ddus a is autoridadis candu su sistema ddus classìficat che "atividadi assumbrida".

Po calincunu custu est unu bantaxu, ca permitit de preveni is crìminis e de ndi agatai is responsàbilis candu custus acuntessint. Po àterus, nudda giustìficat un'invasioni de sa riservadesa de is personis. Sa petitzioni chistionat fintzas de stùdius chi amostant chi custas tecnologias amànnient is discriminatzionis e siant impreadas po castigai a personis chi circant sceti s'arrespetu de is deretus insoru.

Sa petitzioni, chi pedit de proibiri custas pràticas comenti unas cantu citadis ant giai fatu e de publicai is arresurtaus de is guardianias giai fatas, at passau is 8300 firmas in cuàturu diis sceti. Totus dda podint firmai, chi funt de acòrdiu.