In Frantza sa politzia podit scocai a is tzitadinus cun is telefoneddus insoru

Pagu apustis de is protestas mannas incumentzadas cun sa morti de Nahel Merzouk, in Frantza est passada una lei noa chi permitit a sa politzia de arregistrai datus de is dispositivus de personas suspetadas de crìminis cun assumancu cincu annus de castigu. Custus datus funt sa positzioni, s'àudiu de su micròfonu e sa màgini de sa fotocàmera de telefoneddus e àterus dispositivus chi includint custus trastus, comenti ordinadoris, tauleddas etc.

Oindii is dispositivus chi funt scoviadroxus potentzialis funt medas. Aforas de is chi eus giai mentovau ddoi funt assistentis vocalis, televisionis intelligentis (ma no totus: medas no portant ni micròfonu ni fotocàmera), arrellògius intelligentis e dispositivus de assistèntzia de is veturas. Totu cosas chi portaus sèmpiri a fatu fintzas me is momentus de intimidadi. Mancai s'arregulamentu europeu po sa protetzioni de is datus pòngiat làcanas a is datus personalis chi fait a arregistrai, no teneus garantzia peruna chi malintentzionaus no ddu fatzant a su pròpiu. Craru est chi sa possibilidadi chi siat una fortza de politzia ofitziali a scocai sa vida privada nosta cun custus dispositivus est unu scenàriu nou chi fait a orroliai.

Garantit su Ministru de Giustìtzia Éric Dupond-Moretti chi custa lei no at a pirmiti de scocai a totu is tzitadinus, narendi chi at a pertocai unu màssimu de pagu dozinas de imbìstigus a s'annu e fintzas chi "Seus a tesu de su totalitarismu de 1984 de George Orwell" - un'arremonada chi fait pensai chi sa mesura siat manna meda fintzas po issu chi dd'at pensada.

A s'imbessi, a bisu de su grupu po is deretus digitalis La Quadrature du Net custu est un'atacu "a su deretu a sa seguresa, a sa vida privada e a sa currispondèntzia privada", ca custu iat a podi essi sceti s'incomentzu de unu procedimentu chi at a essi spainau fintzas a crìminis prus piticus.