Est incumentzada sa sperimentatzioni de IT Wallet

In Itàlia est incumentzada custa diis sa sperimentatzione de IT Wallet, su sistema chi permitit de tenni is documentus in is dispositivus mòbilis nostus invecis de ddus portare in forma de tèssera o paperi. Su portafòlliu digitali est parti de unu progetu prus mannu po creai un'identidadi digitali a livellu europeu aìnturu de su 2026. Is documentus carrigaus in s'app ant a tenni balori legali e s'ant a podi amostai a ofitzialis pùblicos aìnturu de un'averìguu.

IT Wallet est a disponimentu de su 23 de su mesi de ladàmini po 50.000 tzitadinus e a pagu a pagu dd'ant a podi impreai totus, segundu su pranu, su 4 de su mesi de idas.
In s'incumentzu at a fai a carrigai sa patenti, sa tèssera sanitària e sa tèssera europea de sa disabilidadi. No si podit carrigai ni su documentu de identidadi ni tzertificaus, ma at a fai in su benidori.

Po su momentu, podint proai s'IT Wallet sceti is impitadoris chi ant arriciu un'invitu a scarrigai s'app e po ddoi intrai serbit su SPID o sa tèssera de identidadi eletrònica.

No scieus meda in contu de is medidas de seguridadi chi nd'ant bogadu a campu po s'amparu de is datus de s'impitadori, chi custa borta funt dilicaus meda, ma de seguru siat sa comunicatzioni cun is serbidoris de su guvernu siat s'ammentu de is datus in sa memòria de su dispositivu ant a impreai sa critografia po limitai su perìgulu de fura.

Ligendi is cumentus in s'arretza, parit chi is impitadoris si siant giai partzendi in unu grupu chi pensat chi custa novidadi siat utilosa e prus còmoda e segura de si portai is documentos fìsicus a fatu e àterus chi biint perìgulus nous po sa privatesa.
De seguru, custa forma noa de arreguai is documentos tenit problemas chi innantis no ddoi fiant: cun una tèssera de plàstica o de paperi su perìgulu prus mannu est a ddus perdi o chi si-ddus furint cun totu su portafòlliu, ma cun sa forma eletrònica ddoi at sèmpiri sa possibilidadi de un'atacu informàticu a is dispositivus o a s'arretza de su guvernu po ndi furai is datus o mancai po nd'impediri su funtzionamentu. In prus, est giustu a si domandai ita iat a acuntessi si po càncua arraxoni s'arretza no funtzionat: s'iaus a agatai chena documentus?

In finis, scieus chi po imoi su portafòlliu digitali no est obligatòriu, ma est craru chi totu s'Europa si movit cara a sa digitalizatzioni de cale si siat documentu. Si custu at a acuntessi, èticu iat a essi de parti de is guvernus a pediri a is tzitadinus a comporari unu telefoneddu e pagai sa connessioni a Internet po podi tenni unu documentu bàlidu? Funt chistionis de importu chi bolint cunsideradas.