Est incumentzada s'isperimentatzione de IT Wallet

In Itàlia est incumentzada custa dies s'isperimentatzione de IT Wallet, su sistema chi permitit de tènnere is documentos in is dispositivos mòbiles nostros imbetzes de ddos portare in forma de tèssera o paperi. Su portafòlliu digitale est parte de unu progetu prus mannu pro creare un'identidade digitale a livellu europeu a intro de su 2026. Is documentos carrigados in s'app ant a tènnere balore legale e s'ant a pòdere ammustrare a ufitziales pùblicos a intro de un'averìguu.

IT Wallet est a disponimentu dae su 23 de su mese de ledàmene pro 50.000 tzitadinos e a pagu a pagu dd'ant a pòdere impreare totus, segundu su pranu, su 4 de su mese de idas.
In s'incumentzu at a fàghere a carrigare sa patente, sa tèssera sanitària e sa tèssera europea de sa disabilidade. Non si podet carrigare nen su documentu de identidade nen tzertificados, ma at a fàghere in su benidore.

Pro su momentu, podent proare s'IT Wallet isceti is impitadores chi ant retzidu un'invitu a iscarrigare s'app e pro ddoe intrare serbit su SPID o sa tèssera de identidade eletrònica.

No ischimus meda in contu de is medidas de seguridade chi nd'ant bogadu a campu pro s'amparu de is datos de s'impitadore, chi custa borta sunt delicados meda, ma de seguru siat sa comunicatzione cun is serbidores de su guvernu siat s'ammentu de is datos in sa memòria de su dispositivu ant a impreare sa critografia pro limitare su perìgulu de fura.

Leghende is cummentos in sa retza, paret chi is impitadores si siant giai partzende in unu grupu chi pensat chi custa novidade siat utilosa e prus còmoda e segura de si portare is documentos fìsicos a fatu e àteros chi bident perìgulos noos pro sa privatesa.
De seguru, custa forma noa de arregulare is documentos tenet problemas chi in antis non ddoe fiant: cun una tèssera de plàstica o de paperi su perìgulu prus mannu est a ddos pèrdere o chi nos ddos furent cun totu su portafòlliu, ma cun sa forma eletrònica ddoe at semper sa possibilidade de un'atacu informàticu a is dispositivos o a sa retza de su guvernu pro nde furare is datos o mancari pro nde impedire su funtzionamentu. In prus, est giustu a si domandare ite diat a acuntèssere si pro carchi resone sa retza non funtzionat: nos diamus a agatare chene documentos?

In fines, ischimus chi pro immoe su portafòlliu digitale no est obligatòriu, ma est craru chi totu s'Europa si moet cara a sa digitalizatzione de cale si siat documentu. Si custu at a acuntèssere, èticu diat a essere dae parte de is guvernos a pedire a is tzitadinos a comporare unu telefoneddu e pagare sa connessione a Internet pro pòdere tènnere unu documentu bàlidu? Sunt chistiones de importu chi bolent cunsideradas.